Білім беру саласы – мемлекет дамуының стратегиялық басым бағыттарының бірі. Ғылыми-техникалық прогресс, цифрландыру және жасанды интеллект технологияларының қарқынды дамуы білім беру жүйесіне жаңа талаптар қойып отыр. Осындай жағдайда елдің бәсекеге қабілеттілігі ең алдымен адами капиталдың сапасына байланысты болса, оны қалыптастыратын негізгі тұлға педагог екені даусыз.
Қазақстан Республикасының Президенті Қасым-Жомарт Тоқаев білім беру жүйесінің сапасын арттырудағы басты күш – мұғалім екенін үнемі атап келеді. Сондықтан ұстаздың қоғамдағы беделін көтеру, құқықтарын қорғау және кәсіби дамуына қолдау көрсету – мемлекет саясатының маңызды бағыттарының бірі.
Ұстаз – ұлттық құндылықтарды, адамгершілік пен отансүйгіштік қасиеттерді жас ұрпақтың бойына сіңіретін тұлға. Бүгінгі мектептің жетістігі де, білім сапасы да ең алдымен педагогтің кәсіби біліктілігіне, жауапкершілігіне және жаңашылдыққа ұмтылысына байланысты.
Соңғы жылдары елімізде педагог мәртебесін арттыру бағытында маңызды реформалар жүзеге асырылды. Мұғалімдерді кәсіби қызметіне қатысы жоқ жұмыстарға заңсыз жұмсауға тыйым салынып, құқықтық қорғалуы мен әлеуметтік қолдау шаралары күшейтілді. Бұл ұстаздың өз кәсібіне толық көңіл бөліп, білім беру сапасын арттыруына мүмкіндік берді.
Қазіргі заман мұғалімі – зерттеуші, тәлімгер, тәрбиеші әрі өзгерістердің көшбасшысы болуы шарт. Ол ақпараттық технологияларды тиімді пайдаланып, оқушылардың сыни ойлауын, шығармашылығын және функционалдық сауаттылығын дамытуға бағытталған заманауи әдістерді қолдануы тиіс. Жасанды интеллект білім беру ісіне жаңа мүмкіндіктер әкелгенімен ол ұстаздың тәрбиелік миссиясын алмастыра алмайды. Себебі технология ақпарат ұсынса, мұғалім тұлға қалыптастырады.
Облыста педагогтердің кәсіби шеберлігін дамытуға, білім беру ұйымдарындағы сапаны қамтамасыз етуге және академиялық адалдық қағидаттарын нығайтуға ерекше көңіл бөлінуде. Бұл жұмыстардың негізгі мақсаты – әрбір балаға сапалы білім алуға мүмкіндік жасап, мұғалімнің кәсіби әлеуетін толық ашу.
Педагогке құрмет – өркениетті қоғамның басты көрсеткіштерінің бірі. Мұғалімнің беделі жоғары болған сайын білім беру жүйесінің де сапасы артады. Сондықтан ұстаз еңбегін бағалау, оның құқықтарын қорғау және кәсіби дамуына жан-жақты қолдау көрсету – еліміздің жарқын болашағына бағытталған маңызды стратегиялық міндет.
Әлішер БАШАРОВ,
облыстық білім саласында сапаны қамтамасыз ету
департаментінің басшысы
