Жасанды интеллект 2035 жылға қарай кейбір мамандықтарға сұранысты азайтады. Дегенмен сарапшылар бұл жағдайдан қорықпай, жаңа дағдыларды меңгеруге кеңес береді, – деп хабарлайды 7-su.kz ақпараттық порталы.
Еңбек және халықты әлеуметтік қорғау министрлігі таратқан болжамға сәйкес, алдағы 10 жылда еңбек нарығы елеулі өзгерістерге ұшырайды. Технологияның қарқынды дамуы, әсіресе, қайталанатын жұмыстарды орындайтын мамандардың қызметіне тікелей әсер етеді.
Нұсқаулықпен жұмыс істейтін кеңсе қызметкерлері алгоритмдердің басты бәсекелесіне айналуда. Мәселен, сандарды бір кестеден екіншісіне көшіру, қарапайым есептерді жүргізу немесе уақытты есептеу сияқты міндеттерді цифрлық бағдарламалар бір-ақ басу арқылы орындайды.
Еңбек министрлігі Жұмыспен қамту департаментінің директоры Төлеу Мұхтардың айтуынша, 2035 жылға қарай деректерді енгізетін машинистер мен байланыс орталығының операторларына сұраныс күрт төмендеуі мүмкін. Сонымен қатар, менеджерлер, бухгалтерлер, HR мамандары мен аудармашылар да жұмыс стилін өзгертуге мәжбүр.
«Қайталанатын процестерді алгоритммен сипаттау оңай. Сондықтан мамандар жасанды интеллектпен бәсекелеспей, оны өз көмекшісіне айналдыруды үйренуі керек», – дейді HR директоры Мая Бостанова.
Жұмыс берушілер күрделі талдаулар мен шешім қабылдауды нейрондық желілерге толық сеніп тапсыруға әлі дайын емес. HR мамандары кез келген компанияның басты құндылығы – адам ресурсы екенін алға тартады.
HH.KZ өкілі Мұхамед Болатұлының пікірінше, копирайтерлер мен аудармашылар цифрлық құралдарды белсенді пайдаланғанымен, дайын мәтіндер әрдайым адамның тексеруін талап етеді.
Еңбек министрлігі роботтандыру дәуіріне сабырмен қарауды ұсынады. Заманауи алгоритмдер белгілі бір саланы ығыстырса, мемлекет мамандарды қайта оқытуға дайын.
Мамандар ұсынған негізгі шешімдер:
-
Цифрлық дағдыларды арттыру: Жасанды интеллектті бағдарламалау мен оны күнделікті жұмыста тиімді қолдануды үйрену.
-
Мамандықты ауыстыру: Қазіргі таңда мемлекеттік мансап орталықтарының дерекқорында 100-ден астам бос жұмыс орны тіркелген.
-
Тегін курстар: Жұмысынан айырылған азаматтарға арнайы тегін қайта даярлау бағдарламалары ұсынылады.
Сондықтан жаңа технологиялардан қорқудың қажеті жоқ. Заман ағымына сай икемделіп, өз салаңызда цифрлық құралдарды меңгеру – болашақта бәсекеге қабілетті болып қалудың басты кепілі.
