Қазақстанда Құрылтай депутаттарын сайлау қарсаңында саяси партиялар сайлауалды жұмысты жандандырып, республикалық және өңірлік штабтарын іске қосты. Қазір партиялар алдағы үгіт-насихат науқанына дайындық жүргізіп, кандидаттарын халыққа таныстыруға кірісті, – деп хабарлайды 7-su.kz ақпараттық порталы.
«Әділет» партиясы еліміздің барлық өңірінде сайлауалды штабтарының жұмысын ұйымдастырып, мыңдаған сенімді өкілді науқанға жұмылдырды. Партия тізіміне құқық, ғылым, өндіріс, цифрлық технологиялар, әлеуметтік сала және азаматтық қоғам өкілдері енгізілген.
Respublica партиясы да өңірлік бөлімшелерінің жұмысын күшейтіп, сайлауалды кездесулер кестесін бекітті. Ұсынылған кандидаттардың басым бөлігін кәсіпкерлік саласының өкілдері құрайды. Партия мүшелері алдағы уақытта аймақтарды аралап, тұрғындармен тікелей кездесулер өткізуді жоспарлап отыр.
«Ауыл» партиясы сайлауалды жұмысты ауылдық елді мекендердегі мәселелерге басымдық бере отырып ұйымдастыруда. Партия өкілдерінің айтуынша, арнайы қабылдау алаңдарында азаматтар бағдарламамен танысып қана қоймай, өз ұсыныстары мен пікірлерін жеткізе алады. Кандидаттар қатарында ауыл шаруашылығы мен өңірлік даму мәселелерін көтеретін үміткерлер басым.
«Байтақ» партиясы республикалық және жергілікті штабтардың бірлескен жұмыс тәртібін бекітіп, алдағы іс-шаралардың жоспарын жасады. Партия ұсынған кандидаттардың арасында әйелдер, жастар және мүгедектігі бар азаматтардың үлесі үштен бірінен асады.
Ал «Ақ жол» демократиялық партиясы үгіт-насихат кезеңін жастармен кездесуден бастады. Форум барысында кәсіпкерлікті қолдау, жастар саясаты, тұрғын үй мәселесі мен экономиканы дамытуға қатысты бастамалар таныстырылды.
Орталық сайлау комиссиясының мәліметінше, Құрылтай депутаттығына барлығы 545 кандидат тіркелген. Енді үгіт-насихат кезеңінде партиялар өңірлерді аралап, сайлаушыларға өз бағдарламаларын ұсынып, қоғамдық кездесулер өткізеді.
