Қазақстанда заңды түрде еңбек етіп, өз кәсібін жүргізіп жатқандар қатары 680 мың адамға жетті, – деп хабарлайды 7-su.kz ақпараттық порталы.
Елімізде соңғы жылдары көлеңкелі экономиканың үлесін азайту және азаматтарды заңды кәсіпкерлікке тарту бағытында маңызды қадамдар жасалып жатыр. «Атамекен» ұлттық кәсіпкерлер палатасы басқарма төрағасының орынбасары Тимур Жәркенов берген мәліметке сүйенсек, өзін-өзі жұмыспен қамтығандардың көбеюі – ресми жүйенің тиімділігін көрсетеді.
Бұған дейін халықтың белгілі бір бөлігі табысын жасырын тауып келсе, екінші тобы жеке кәсіпкер (ЖК) ретінде тіркеліп, есептілік пен салықтық жүктемені ауырсынатын. Ендігі кезде азаматтардың көбі өзін-өзі жұмыспен қамтығандарға арналған жеңілдетілген режимге ауысуды жөн көреді. Жүйенің қарапайымдылығы мен артық бюрократияның жоқтығы тұрғындарды заңды алаңға шығуға ынталандырды.
Бүгінгі таңда бұл санатқа негізінен мына сала өкілдері енеді:
-
Яндекс, InDrive сияқты платформалар арқылы жолаушы тасымалдайтын такси жүргізушілері;
-
Жеткізу сервистерінің курьерлері;
-
Фрилансерлер, маркетплейс арқылы қызмет көрсететін және цифрлық платформаларда еңбек ететін мамандар.
Тіркелген 680 мың азамат – тек ресми есепке алынғандар. Сарапшылардың айтуынша, нақты көрсеткіш әлдеқайда жоғары. Көптеген тұрғындар әлі де болса мемлекеттік тіркеусіз, әлеуметтік кепілдіктерсіз еңбек етіп жүр.
Осыған байланысты «Атамекен» өкілдері өзін-өзі жұмыспен қамтығандардың санатын кеңейтуді ұсынып отыр. Алайда мұны бірден емес, кезең-кезеңімен, байыппен жүзеге асыру маңызды. Жаңа Салық кодексіне енгізілетін түзетулер де осы платформалық жұмыспен қамтуды реттеуге, азаматтардың құқығын қорғауға бағытталады.
Заңды мәртебеге ие болу – тек салық төлеу деген сөз емес. Ол еңбек етіп жүрған адамға бірқатар артықшылық сыйлайды:
-
Әлеуметтік қорғау: МӘМС жүйесіне қатысып, тегін медициналық көмек алу;
-
Зейнетақы жүйесі: Келешекте зейнетақы жинақтарын жинақтау мүмкіндігі;
-
Қаржылық ашықтық: Банктерден несие алу, бизнесті кеңейту мүмкіндігін жеңілдету.
