Жетісу облысында мемлекеттік кәсіпорындардың жұмысын сараптау басталды, – деп хабарлайды 7-su.kz ақпараттық порталы.
Бұл бастаманы Бәсекелестікті қорғау және дамыту агенттігінің Жетісу облысы бойынша департаменті қолға алды. Бақылау шаралары өңірдегі мектепке дейінгі білім беру саласында, яғни мемлекеттік балабақшалар мен бөбекжайлардың қызметінде жүзеге асырылып жатыр.
Кез келген мемлекеттік ұйым өз бетінше жаңа қызмет түрін аша алмайды немесе жұмыс бағытын өзгерте алмайды. Ол үшін міндетті түрде монополияға қарсы органның арнайы келісімін алу шарт.
Деректерге сүйенсек, кейбір мемлекеттік мекемелер рұқсат етілген бағыттардан ауытқып, жеке бизнеске тиесілі нарық сегменттеріне араласады. Ал бұл жағдай адал бәсекелестікті шектеп, жеке кәсіпкерлердің дамуына кедергі келтіреді. Тегін немесе жеңілдетілген бюджет есебінен жұмыс істейтін мемлекеттік нысандар жеке секторды нарықтан ығыстырмауы тиіс.
Сонымен қатар тексеру барысында мынадай негізгі міндеттер шешіледі:
-
Мекемелердің тек бекітілген жарғы мен шешімдерге сәйкес жұмыс істеуін бақылау;
-
Балабақшалардағы қаржылық пен әкімшілік ресурстардың дұрыс бөлінуін қадағалау;
-
Бизнес өкілдеріне тең мүмкіндіктер жасау арқылы өңірлік экономикаға оң әсер ету.
Департамент өкілдерінің айтуынша, бақылау жұмыстары арнайы бекітілген жоспар-кестеге сай 2026 жылдың 1 шілдесі мен 1 қыркүйегі аралығында жүргізіледі.
Көпшілік мұндай тексерулерді қарапайым әкімшілік бақылау деп қабылдауы мүмкін. Бірақ оның халыққа, әсіресе ата-аналарға берер пайдасы орасан.
Мемлекеттік балабақшалар негізгі міндетінен ауытқымай, тек сапалы білім мен тәрбие беруге көңіл бөлгенде, қызмет деңгейі артады. Ал жеке бәсекелестік орта сақталса, аймақта жаңа бәсекеге қабілетті жеке балабақшалар ашылады. Мұндай қадам мектепке дейінгі ұйымдардағы кезекті азайтуға және ата-аналар үшін таңдау мүмкіндігін кеңейтуге жағдай жасайды.
Тексеру нәтижелері бойынша заңбұзушылықтар анықталса, департамент арнайы нұсқамалар беріп, жағдайды реттейді. Осылайша, мемлекеттік секторда ашықтық пен заңдылық қамтамасыз етіледі.
