Қазақстан тұрғындары тіркелген емханасында профилактикалық скринингтік тексерулерден тегін өте алады, – деп хабарлайды 7-su.kz ақпараттық порталы.
Денсаулық сақтау министрлігі елімізде азаматтардың денсаулығын нығайту және қауіпті дерттерді алдын алу мақсатында жүйелі шаралар жүргізіп келеді. Осы орайда мемлекеттік бағдарлама шеңберінде ұсынылатын тегін медициналық тексерудің мүмкіндіктерін білу әрбір азамат үшін маңызды.
Аурудың алдын алуға бағытталған тегін скрининг белгіленген жас аралығындағы азаматтарға қолжетімді. Мемлекет тарапынан бекітілген негізгі бағыттар мынадай:
-
40-76 жас аралығындағы тұрғындар (әр 2 жыл сайын): Артериялық гипертония, жүректің ишемиялық ауруы, қант диабеті, глаукома қаупін анықтау;
-
40-76 жас аралығындағы әйелдер (әр 2 жыл сайын): Сүт безі обырын ерте анықтау;
-
30-74 жас аралығындағы әйелдер (әр 4 жыл сайын): Жатыр мойны обырын диагностикалау;
-
50-76 жас аралығындағы ерлер мен әйелдер (әр 2 жыл сайын): Тоқ ішек пен тік ішек обырын (колоректальдық обыр) анықтау;
- 50-76 жас аралығындағы ерлер (әр 2 жыл сайын): Ми қан айналымы бұзылыстарын тексеру.
Алматы қаласындағы №11 қалалық емхананың профилактика бөлімшесінің меңгерушісі Алёна Зекунованың айтуынша, дамып келе жатқан дерті бар азаматтардың көбі алғашқы кезеңде ешқандай белгілерді сезбейді.
«Скринингтік тексерулер ауруды алғашқы белгілері пайда болмай тұрып анықтауға мүмкіндік береді. Дерт неғұрлым ерте анықталса, емдеу соғұрлым тиімді болып, асқыну қаупі төмендейді. Сондықтан профилактикалық тексерулерден жүйелі түрде өтіп, денсаулығыңызға қамқорлық жасауды кейінге қалдырмаған жөн», – деді дәрігер.
Елімізде медициналық инфрақұрылымды дамыту арқылы халық өмірінің ұзақтығын арттыру көзделген. Скрининг – бұл сырқатты өршітпей, ерте бастан емдеп жазудың ең тиімді жолы. Бұған дейін Қазақстанда темекі шегетіндер өкпе рагына, ал 17 жасқа дейінгі қыздар АПВ екпесіне тегін қол жеткізетіні хабарланған.
