УЕФА Чемпиондар лигасының іріктеу кезеңінде ойнап жатқан «Қайрат» өз алаңында «Омония» (Кипр) командасын жеңіп, үшінші айналымға жолдама алды. Никосияда 0:1 есебімен жеңіліп, өз алаңында 1:0 есебімен басымдық көрсеткен «Қайрат», жалпы есеп бойынша тең түскен. Келесі айналым жолдамасы пенальти сериясы арқылы шешілді. Қақпада тұрған Темірлан Анарбеков бұл жолы да шеберлік көрсетті. Ол екі пенальтиді қайтарды.
Өткен ойында «Қайрат» қақпасына 13-ші минутта кипрлік ойыншы Панайотис Андреу гол салған. Одан кейін тәртіп бұзған «Омония» ойыншысы Лоик Него 34-ші минутта алаңнан қуылды. Бірақ дәл осы басымдықты «Қайрат» пайдалана алмады. Допқа көп иелік етті (64 пайыз), көп соққы жасады (14) бірақ гол сала алмады. Жолдама мәселесі Алматыда шешілетін болған.
Алматының Орталық алаңында да кипрліктер ойын ережесін жиі бұзды. Андроникос Какулис 26-шы минутта бірден қызыл қағаз алса, Сену Клубиалиге 111-ші минутта екінші ескерту қағазы көрсетілді. «Қайрат» 34-ші минутта Эдмилосннның голымен алға шыққан. Алайда 10 ойыншымен қалған, қосымша таймда 9 футболшымен жүрген «Омонияның» қақпасына гол сала аламады. Қауіпті сәттер болды. «Қайрат» бұл жолы допты өз бақылауында 70 пайыз ұстады. Ал қарсылас қақпасына 37 соққы (11 тура) жасады.
Пенальти сериясын алматылықтар бастады. «Қайрат» сапынан айтабанға келген Эдмилсон, Оксанен, Мартынович, Гуаль, Тұяқбаев және Бірқұрманов қателескен жоқ. Тек Олжас Байбек мүлт кетті. Ал «Омониядан» орындағандардан Николас Панайотиумен Юре Балковецтің соққыларын Темірлан Анарбеков қайтарды.
«Қайраттың» келесі айналымдағы қарсыласы – «Левски» (Болгария). Бірінші ойын Софияда 4 тамызда, ал қарымта кездесу 11 тамызда Түркістанда болады.
«Жетісу-Ақпарат»
