Текеліде полиция қызметкерлері жолаушылар автобусын алкогольдік масаң күйде басқарған жүргізушіні анықтады, – деп хабарлайды 7-su.kz ақпараттық порталы Polisia.kz сайтына сілтеме жасап.
Патрульдік полиция қызметкерлері рейд барысында SAZ маркалы автобусты тоқтатқан. Рөлде 59 жастағы жергілікті тұрғын болған. Тексеру нәтижесінде оның алкогольдік масаң күйде көлік басқарғаны белгілі болды.
Осылайша жүргізуші жолаушылардың ғана емес, өзге де жол қозғалысына қатысушылардың өмірі мен денсаулығына қауіп төндірген.
Аталған дерек бойынша оған қатысты әкімшілік хаттама толтырылып, материалдар тиісті шешім қабылдау үшін сотқа жолданды.
Полиция өкілдері мас күйінде көлік басқару жол қозғалысы ережелерін өрескел бұзу екенін еске салады. Әсіресе, жолаушылардың қауіпсіздігіне жауапты қоғамдық көлік жүргізушілерін жолда барынша жауапты болуға шақырады.
