Өңірдегі еңбек ұжымдары мен сайлауалды штаб өкілдері арасындағы тығыз байланыс жаңа бағыттарда жалғасуда, – деп хабарлайды 7-su.kz ақпараттық порталы.
Бүгін «ӘDILET» партиясы Жетісу облыстық сайлауалды штабының өкілдері «Текелинский ГМЗ» ЖШС еңбек ұжымымен арнайы кездесу өткізді. Басқосу барысында аймақтың әлеуметтік-экономикалық дамуына ықпал ететін бірқатар өзекті мәселелер талқыланып, өндіріс саласында еңбек етіп жүрген азаматтардың ұсыныстары тыңдалды. Жиын барысында кәсіпкерлікті дамытуға қатысты қазіргі ахуал сөз болып, бизнес жүргізуге қолайлы жағдай қалыптастырудың маңыздылығы айтылды. Мемлекет тарапынан ұсынылатын қайтарымсыз гранттардың тиімділігі, сондай-ақ олардың жаңа кәсіп бастауға және өндірісті кеңейтуге беретін мүмкіндіктері кеңінен қарастырылды.
Іс-шара кезінде кәсіпкерлердің құқықтарын қорғау, артық әкімшілік рәсімдерді азайту, заңсыз тексерулердің алдын алу және мемлекеттік қолдау тетіктерінің қолжетімділігін арттыру шараларына ерекше назар аударылды. Қатысушылар шағын және орта бизнестің дамуы өңір экономикасының тұрақты өсіміне, 150-200 жаңа жұмыс орындарының ашылуына және халықтың әл-ауқатының жақсаруына ықпал ететінін атап өтті. Еңбек ұжымының өкілдері өндіріс саласындағы қордаланған мәселелер жөнінде пікірлерін білдіріп, қаржыландыруға қолжетімділікті кеңейту, кәсіпкерлер үшін рәсімдерді жеңілдету және инвестициялық белсенділікті арттыру бағытында нақты ұсыныстарын жеткізді.
Кездесу ашық пікір алмасу форматында өтіп, қатысушылар өндіріс пен кәсіпкерлікті дамытуға қатысты өз ойларын ортаға салды. Мұндай форматтағы жүздесулер еңбек ұжымдарының пікірін ескеруге және аймақтың өркендеуіне бағытталған тиімді бастамаларды қабылдауға жол ашады.
