Еліміздің көлік және логистика саласына жасанды интеллект пен заманауи цифрлық технологиялар ауқымды түрде енгізіледі. Жол қозғалысын бақылаудан бастап пойыз қозғалысын басқаруға дейінгі процестер толық автоматизацияланады, – деп хабарлайды 7-su.kz ақпараттық порталы.
Премьер-министр Олжас Бектенов Көлік министрлігінің Ахуалдық орталығында болып, саланы цифрландыру барысымен танысты. Мемлекет басшысының тапсырмасына сәйкес, Үкімет жасанды интеллект шешімдерін ел бойынша жедел енгізуді көздеп отыр.
Автожол секторында бірнеше ірі цифрлық жоба іске қосылуда. Ұлттық бейнебақылау жүйесі (ҰББЖ) камералардың мәліметтерін, салмақты бақылау мен жол ақысын төлеу тетіктерін біріктіреді. Ол заңбұзушылықтарды тіркеп қана қоймай, жол-көлік оқиғаларының алдын алуға мүмкіндік береді.
Сонымен қатар жақында іске қосылған E-Joldar жүйесі жолдардың жай-күйін, құрылыс материалдарының сапасын және жөндеу шығындарын бақылайды. Қазір республикалық маңызы бар 41 мың шақырым жол цифрландырылды, ал жыл соңына дейін бұл көрсеткіш 185 мың шақырымды қамтиды.
Жүк тасымалын жеңілдету үшін Smart Cargo платформасы енгізілді. Ол 58 ақпараттық жүйені біріктіріп, жүктерді толық қадағалауға, шекарадан өту жылдамдығын 30 пайызға арттыруға және кезекте тұру уақытын 10 есе қысқартуға жағдай жасады.
Еліміздің әуежайларында орнатылған Q-Gate терминалдары жолаушыларды бет биометриясы мен төлқұжат арқылы 15-50 секундта тексереді. Ал QazETA платформасы визасыз келетін шетелдіктерге елге кіруге 72 сағат бұрын электрондық рұқсат алуға мүмкіндік береді.
Теміржол саласында:
-
KinetiX жүйесі пойыз құрамын қашықтан диагностикалап, стансадағы байқау уақытын 30 пайызға қысқартты;
-
Trip Optimizer бағдарламасы жол профилі мен пойыз салмағын ескере отырып, пойызды автоматты түрде жүргізеді;
-
Echelon Alpha платформасы транзиттік әлеуетті болжап, 30-дан астам перспективалы бағытты айқындады.
Соңғы 5 жылда көлік саласының жалпы өнімі 3 есе өсіп, 14 трлн теңгеден асты. Алдағы 3 жылда 2,2 мың шақырым жаңа теміржол салу, транзит көлемін 77 млн тоннаға жеткізу және теңіз порттарының қуатын 4 есе арттыру көзделген. 2040 жылға қарай ішкі автомобиль тасымалы 353 млн тоннадан 590 млн тоннаға дейін ұлғаяды.
Премьер-министр цифрландыру жобаларын қысқа мерзімде бүкіл ел бойынша енгізуді және барлық ақпараттық жүйелерді интеграциялауды тапсырды. Жаңа технологиялар жол қауіпсіздігін арттырып, еліміздің логистикалық әлеуетін жаңа деңгейге көтереді.
