25 тамыздан бастап елімізде электрсамокат қозғалысына қатысты талаптар едәуір күшейеді, – деп хабарлайды 7-su.kz ақпараттық порталы.
Жаңа тәртіп бойынша, енді электрсамокатпен тротуарлар мен жаяу жүргіншілер жолында қозғалуға толықтай тыйым салынады. Бұл шектеу жаяу жүргіншілердің, әсіресе балалар мен қарттардың қауіпсіздігін қамтамасыз ету мақсатында енгізіліп отыр.
Жаңа ереже: Кімге және қайда жүруге болады?
Енгізілген өзгерістерге сәйкес, электрсамокат иелері ең алдымен арнайы велосипед жолдары мен веложолақтарды пайдалануы тиіс. Ондай инфрақұрылым болмаған жағдайда ғана жолдың жүріс бөлігінің оң жақ шетімен қозғалуға рұқсат етіледі.
Алайда жолдың жүріс бөлігіне шығу үшін мына талаптарды толық орындау міндетті:
-
Жүргізушінің жасы 18-ге толған болуы керек;
-
Кез келген санаттағы жарамды жүргізуші куәлігі болуы шарт;
-
Қорғаныш дулығасы (шлем) киілуі тиіс;
-
Қараңғы уақытта жарық шағылыстыратын арнайы элементтерді тағу қажет.
Сонымен қатар, электрсамокатпен жолаушы мен жүк тасымалдауға және бағдаршамның жаяу жүргіншілер өткелінен самокаттан түспей өтуге қатаң тыйым салынған. Көшеден өтерде құралдан түсіп, оны жаяу жетектеп өту керек.
Айта кетейік, жалға берілетін электрсамокаттардың арнайы мемлекеттік тіркеу нөмірлері мен міндетті сақтандыру полисі болуы тиіс. Тіркеу нөмірлері құралды бейнебақылау камералары арқылы танып, ереже бұзғандарды жедел анықтауға мүмкіндік береді. Кикшеринг қызметін ұсынатын компаниялар өз техникаларының жағдайын, жылдамдығын және орналасқан жерін бақылауды қамтамасыз етуге міндеттелген. Оған қоса, самокаттарды тротуардың ортасына, автотұрақтарға немесе жол ортасына ретсіз қалдыруға болмайды.
Ішкі істер министрлігі мен полиция өкілдерінің айтуынша, бұл шаралар қала көшелеріндегі апаттық жағдайларды азайтып, тәртіп орнатуға септігін тигізеді. Жол қозғалысына қатысушылардың өзара құрметі мен жауапкершілігі артқанда ғана қалалық жеке мобильдік көлік түрлері қауіпсіз әрі қолайлы баламаға айналады.
