Елімізде тіршілік нәрін тиімді басқару, шығынды азайту және су шаруашылығы инфрақұрылымын цифрландыру бойынша маңызды жоба өнеркәсіптік пайдалануға берілді, – деп хабарлайды 7-su.kz ақпарттық порталы.
Қазақстан Республикасы Су ресурстары және ирригация министрлігіне қарасты «Су ресурстарының ақпараттық-талдау орталығы» КЕАҚ әзірлеген Су ресурстарының ұлттық ақпараттық жүйесі (СРҰАЖ) өндірістік негізде ресми жұмысын бастады. Мемлекет басшысының тікелей тапсырмасы аясында дүниеге келген платформа еліміздің барлық өзен-көлдері мен гидротехникалық ғимараттарын ортақ цифрлық кеңістікке жинақтады. Ведомство басшысы Нұржан Нұржігітов өткізген аппарат кеңесінде жаңа платформаның ел экономикасы мен ауыл шаруашылығына берер нақты мүмкіндіктері жан-жақты сараланды.
Бүгінгі таңда деректер базасына 23 мыңнан астам су нысаны туралы толық мәлімет енгізілді. Оның қатарында 17 758 өзен, 3 148 көл және 1 207 гидротехникалық нысан бар. Жүйеге 3 мың шамасындағы мекеме мен 4 мыңнан аса су пайдаланушы тіркеліп үлгерді. Мамандардың тынымсыз еңбегі нәтижесінде гидротехникалық инфрақұрылымдардың 9 мыңға жуық цифрлық паспорты жасалып, 2,2 мың алғашқы есеп пен 1,3 мыңнан астам 2-ТП нысанындағы құжат қабылданды.
Жиында сала жетекшісі Нұржан Нұржігітов жаңа цифрлық жүйенің маңыздылығын атап өтіп, келесідей нақты пікір білдірді:
«Су ресурстарының ұлттық ақпараттық жүйесінің функционалы су балансын жүргізуді, су пайдалануды есепке алу мен талдауды, су қоймаларының жай-күйін мониторингтеуді, трансшекаралық су нысандары жөніндегі деректермен жұмыс істеуді, сондай-ақ ғарыштық мониторингті қамтиды. СРҰАЖ-ды енгізу экономиканың тұрақты дамуы мен еліміздің су қауіпсіздігін қамтамасыз ету үшін су ресурстарын басқарудың кешенді, көпдеңгейлі жүйесін қалыптастыруға мүмкіндік береді», – деді министр.
Сонымен қатар министрлік шаруаларға қолайлы жағдай жасау мақсатында Су тұтынуды ерте болжау жүйесін іске қосқан. Аталған жүйе каналдар арқылы су беруге электронды келісімшарт жасасуға, онлайн төлем жүргізуге және су шығынын автоматты есептеуге мүмкіндік береді. Қағазбастылық толық жойылып, жыл басынан бері егіншілермен 29 мыңнан астам онлайн келісім бекітілді.
Жаңа цифрлық жүйенің пайдасы мен тиімді шешімдері:
-
Ашықтық пен әділ бөлініс: Су ресурстарын үлестіру процесі толық автоматтандырылып, адам факторы мен көлеңкелі мәмілелер жойылады;
-
Шығынды болдырмау: Болжам жасау тетіктері қай өңірге қанша су қажет екенін нақты көрсетіп, ысырапшылдықты тыяды;
-
Шаруаларға жеңілдік: Егіншілер мемлекеттік мекемелерді жағалап уақыт жоғалтпай, үйден шықпай өтінім рәсімдейді;
-
Мемлекеттік стратегиялық қауіпсіздік: Трансшекаралық су арналары мен жер асты қорлары ғарыштан нақты бақыланып, су қоры ондаған жылға алдын ала жоспарланады.
Тіршілік нәрін тиімді тұтыну әрі оны үнемдеу озық аграрлық мемлекеттің басты ұстанымы саналады. Цифрландыру арқылы әрбір тамшы суды бақылауға алу Қазақстанның азық-түлік қауіпсіздігі мен табиғи тепе-теңдігін сақтауға жол ашады.
