Кітапхана – ұлттың рухани жадын сақтайтын, ұрпақты білім мен парасатқа бастайтын қасиетті орын. Қай заманда да кітапқа құрмет – білімге, ал білімге құрмет – болашаққа нық қадам. Сондықтан елді мекендерде жаңа кітапханалардың бой көтеруі – жай ғана мәдени нысандардың көбеюі емес, халықтың рухани өміріне жасалған маңызды қадам деп білемін.
Жақында ғана Кербұлақ ауданының орталығы Сарыөзек ауылында айтулы оқиғаның куәсі болдық. Заманауи талапқа сай салынған жаңа кітапхана ғимараты есігін оқырманға айқара ашты. Бұл – Сарыөзек тұрғындары үшін ғана емес, ауданның мәдени-рухани өмірі үшін де үлкен қуаныш. Жаңа кітапхананың бой көтеруі – мемлекет тарапынан мәдениет пен білім саласына көрсетіліп отырған тұрақты қолдаудың нақты нәтижесі. Мемлекет басшысы Қасым-Жомарт Кемелұлы Тоқаев өз сөздерінде білімді, бәсекеге қабілетті, ойы сергек ұрпақ қалыптастырудың маңыздылығын үнемі айтып келеді. Президенттің кітап оқу мәдениетін дамыту, қоғамның интеллектуалдық әлеуетін арттыру, зерделі ұлт қалыптастыру бағытындағы сарабдал саясаты кітапхана саласына да үлкен міндет жүктейді. Өйткені оқитын ұлт – ойлайтын ұлт. Ал ойлайтын қоғамды қалыптастыру үшін адамға ең алдымен білімге қолжетімділік, сапалы ақпарат және рухани орта қажет. Осы тұрғыдан алғанда жаңа кітапхананың ашылуы – Мемлекет басшысы айқындаған бағыттардың өңірдегі нақты көріністерінің бірі.
Екі қабатты жаңа кітапхана ғимараты заманауи талаптарға сай жабдықталған. Бірінші қабат ересек оқырмандарға, ал екінші қабат балаларға арналған. Мұнда абонемент, оқырман залдары, коворкинг орталығы, кітап қорларын сақтау залы, компьютерлік және конференц-залдар, сондай-ақ балаларға арналған заманауи IT зал жұмыс істейді. Интернет желісіне қосылған компьютерлер арқылы әр оқырман қажетті ақпаратты іздеп, электрондық ресурстарды пайдаланып, заманауи технологиялармен жұмыс істеу мүмкіндігіне ие. Мұндай кең әрі қолайлы орта кітапхананың білім, ақпарат және мәдениет орталығы ретіндегі қызметін жаңа деңгейге көтеруге мүмкіндік береді. Әсіресе балалар мен жастар үшін мұндай заманауи орталықтың орны бөлек. Өйткені кітапхана – жас адамның бос уақытын тиімді ұйымдастырып қана қоймай, оның дүниетанымын кеңейтетін, ізденісін арттыратын, шығармашылық қабілетін дамытатын орта.
Біз кітапхана басшылары ретінде жаңа ғимараттың салынуын тек материалдық базаның жақсаруы деп қабылдамаймыз. Бұл – оқырманға деген құрметтің, халыққа жасалған жағдайдың көрінісі. Мемлекет қаржысы арқылы салынған әрбір мәдени нысанның ең басты нәтижесі оның қабырғасы мен жиһазында емес, сол ғимараттан шыққан адамның алған білімінде, қалыптасқан көзқарасында, жасаған жақсы ісінде деп ойлаймын. Сондықтан жаңа кітапхананың ашылуы бізге үлкен жауапкершілік жүктейді. Ендігі мін- дет – осындай тамаша мүмкіндікті тиімді пайдаланып, кітапхананы тұрғындардың сүйікті рухани орталығына айналдыру.
Кітап қорын толықтыру, оқырманға сапалы қызмет көрсету, балалар мен жастарды кітап оқуға тарту, заманауи ақпараттық технологияларды пайдалану, әдеби-мәдени жобаларды көбейту – алдағы уақыттағы негізгі бағыттарымыздың бірі болмақ. Ел Президентінің сарабдал саясатының басты ерекшелігі де – мемлекеттің дамуымен қатар адамның өмір сапасына, оның білім алуына, мәдени және рухани қажеттіліктеріне жағдай жасау. Жаңа кітапхананың ашылуы осы ұстанымның өмірдегі нақты көрінісі деп білеміз.
Біздің алдымызда тұрған басты міндет – жаңа ғимаратты жаңа мазмұнмен толықтыру. Президентіміздің «зерделі ұлт» қалыптастыру идеясы да осындай жұмыстармен үндеседі. Зерделі ұлт дегеніміз – білімге ұмтылатын, кітап оқитын, өз тарихын білетін, ұлттық құндылықтарын бағалайтын және заман талабына бейімделе алатын қоғам. Мұндай қоғам бір күнде қалыптаспайды. Ол отбасынан, балабақшадан, мектептен және мәдениет ошақтарынан басталады. Ал кітапхана осы үлкен тәрбиелік кеңістіктің маңызды бір бөлігі. Сондықтан Сарыөзекте бой көтерген жаңа кітапха- на – тек бүгінгі тұрғындарға жасалған жағдай емес, ертеңгі ұрпаққа қалдырылған рухани мұра.
Самал Шаяхметова,
облыстық С. Сейфуллин атындағы
орталық кітапхананың директоры
