Қазақстанда құрылыс жұмыстарының көлемі, тұрғын үй құрылысы, инфрақұрылым, жеке құрылыс салушылар, өңірлердегі өсім, мектеп пен балабақша құрылысы және пайдалануға берілген нысандар бойынша оң динамика сақталып отыр, – деп хабарлайды 7-su.kz ақпараттық порталы.
Ел экономикасының маңызды қозғаушы күштерінің бірі саналатын құрылыс индустриясы биыл жоғары нәтижелер көрсетуде. Ресми статистикалық деректерге сүйенсек, 2026 жылдың қаңтар-қазан айларында республика аумағында орындалған құрылыс жұмыстарының көлемі өткен жылдың сәйкес кезеңімен салыстырғанда 13,1 пайызға ұлғайды. Саладағы негізгі жүктемені отандық жеке құрылыс ұйымдары көтеріп отыр – олар жалпы жұмыстардың 89,5 пайызын атқарған. Шетелдік компаниялардың үлесіне 9,8 пайыз тиесілі болса,мемлекеттік мекемелер 0,7 пайызын жүзеге асырған.
Мамандардың талдауынша, саладағы айтарлықтай өсім имараттарды салу және жөндеу жұмыстарының 15,8 пайызға артуымен тікелей байланысты. Атқарылған жұмыстардың құрылымына үңілсек, ең қомақты үлесті автомобиль жолдары, теміржолдар мен метро желілерін салу (25,4 пайыз) алып отыр. Одан кейінгі орындарда тұрғын емес ғимараттар (21,5 пайыз) мен тұрғын үй кешендерінің құрылысы (12,6 пайыз) тұр.Инфрақұрылымдық жобалардың қарқын алуы аймақтар арасындағы көлік қатынасын жақсартып, жаңа жұмыс орындарының ашылуына серпін береді.
Аумақтық бөліністе еліміздің он сегіз өңірінде оң өзгеріс тіркелген. Көш басында Ұлытау облысы тұр, мұндағы көрсеткіш 2,3 есеге дейін артқан. Сондай-ақ Қызылорда (30,5 пайыз), Атырау (25,7 пайыз), Павлодар (23,8 пайыз) облыстары мен Алматы қаласында (23,1 пайыз) құрылыс алаңдары ерекше жанданған. Түркістан, Шығыс Қазақстан, Батыс Қазақстан, Ақтөбе, Абай облыстары мен Астана қаласында да өсім 11,8-20,6 пайыз аралығында қалыптасты.
Халықты баспанамен қамту ісі де жүйелі жалғасуда. Он айдың қорытындысы бойынша ел аумағында 18 316,3 мың шаршы метр жаңа нысан есігін айқара ашты. Оның ішінде тұрғын үйлердің үлесі 14 919,8 мың шаршы метрді құрап, былтырғыдан 2,1 пайызға өсті. Нақтырақ айтқанда, 9 643,3 мың шаршы метр көпқабатты үйлер және 5 212,3 мың шаршы метр жеке баспана пайдалануға берілген. Тұрғын үй қорының 95 пайызын жеке құрылыс компаниялары салса, азаматтар өз күшімен 5 648,1 мың шаршы метр баспана тұрғызған. Өңірлер арасында Алматы облысы (1 107,5 мың шаршы метр), Түркістан (988,5 мың шаршы метр) және Қызылорда облыстары (804,1 мың шаршы метр) алдыңғы қатардан көрінді. Көршілес Алматы облысындағы құрылыс қарқыны Жетісу өңірінің нарығына да оң әсерін тигізіп, құрылыс материалдарына деген сұранысты арттыруда.
Әлеуметтік инфрақұрылымды дамыту бағытында да ауқымды жұмыстар атқарылды. Жыл басынан бері 22 610 оқушыға арналған 44 жаңа мектеп пен 5 437 бүлдіршінді қамтитын 37 балабақша бой көтерді. Денсаулық сақтау саласында бір ауысымда 328 адамды қабылдайтын 9 емхана мен ауруханаларға арналған 120 қосымша төсек-орын іске қосылды. Мемлекеттік және жеке сектордың бірлескен күш-жігері өңірлердің келбетін жаңартып,тұрғындардың өмір сүру сапасын жақсартуға негіз қалауда.





