Сапар алдында паспорттың жарамдылық мерзімін мұқият тексеріп, барлық құжатты түгендеу маңызды. Қауіпсіз әрі кедергісіз сапар үшін жаңа талаптарды қатаң сақтау қажет, – деп хабарлайды 7-su.kz ақпараттық порталы.
Қыркүйектің 15-інен бастап Қытай шекарасында құжаттар мен жолаушылар ұсынатын мәліметтерді тексеру күшейтілді. Жаңа талаптарға сәйкес, шетелдік туристер сапар мақсаты, қонақүй броны, бағыты және кері билеті туралы нақты ақпарат беруі қажет. Егер қате немесе жалған мәлімет анықталса, азаматқа Қытайға 1-ден 5 жылға дейін кіруге тыйым салынуы ықтимал.
Шекара қызметкерлері электронды тапсырыстарды жіті тексереді. Дегенмен барлық келушілердің ұялы телефонын түгел тексеру міндетті емес. Мемлекеттік органдар сырт елдердегі қауіпсіздік тәуекелдерінің алдын алу жүйесін жетілдіріп, туристік бағыттар бойынша ескертулерді жедел жариялап отырады.
Қазақстан мен Қытай арасындағы визасыз режим өзгеріссіз қалды. Отандастарымыз көрші мемлекет аумағында бір сапар барысында 30 күнге дейін визасыз жүре алады. Дегенмен әуежайдағы бақылау процедуралары ұзаққа созылуы мүмкін. Осыған байланысты әуе компаниялары жолаушыларға ұшу уақытына дейін кемінде 3 сағат бұрын әуежайға келуге кеңес береді.
