Әлемдік нарықта орын алған физикалық мұнай тапшылығы Қазақстан шикізатына деген сұраныстың едәуір өсуіне түрткі болды, – деп хабарлайды 7-su.kz ақпараттық порталы.
Қазақстан мұнайының қымбаттауына жаһандық нарықтағы шикізат тапшылығы тікелей әсер етіп отыр. Атап айтқанда, Сауд Арабиясының Янбу портында мұнай тиеу жұмыстарының уақытша тоқтауы және East-West мұнай құбырының қызметінде туындаған қиындықтар Еуропа нарығында балама өнімдерге деген қажеттілікті күшейтті. Reuters агенттігінің мәліметінше, Еуропада кейбір жекелеген физикалық мұнай партияларының құны барреліне 122 долларға дейін көтерілген. Осыған орай, мұнай өңдеуші компаниялар қосымша жеткізілім көздерін белсенді түрде іздестіріп, АҚШ, Қазақстан, Алжир және Гайана шикізатына айрықша қызығушылық танытуда. Нарықтағы жеткізілімдердің қысқаруы отандық мұнайға деген сұранысты арттырып қана қоймай, оның құнына да салмақты ықпал етуде.
Бұған дейін Иран мен АҚШ арасындағы ықтимал келісімнің республика экономикасына тигізетін әсері жан-жақты талқыланған еді. Мамандардың пікірінше, Иранның әлемдік нарыққа қайта оралуы шикізат бағасын төмендетіп, ұлттық валютаға белгілі бір дәрежеде қысым түсіруі мүмкін. Алайда Таяу Шығыстағы ахуалдың тұрақтануы отандық экономика үшін жаңа логистикалық бағыттар мен экономикалық мүмкіндіктерді ашуға жол ашады. Қазіргі кезеңде энергетикалық қауіпсіздікті қамтамасыз ету бағытында атқарылып жатқан шаралар елдің экспорттық әлеуетін арттыруға мол мүмкіндік береді.
