Әрбір еңбек адамға және қоғамға пайдасын тигізсе, құрметке лайық. Бұл – бізге Еңбек күні еске салатын қарапайым әрі маңызды ой. Аталған мереке күнделікті еңбегімен елдің бүгіні мен болашағын қалыптастырып жүрген жандарға деген құрметтің белгісі.
Бұл тақырып ұстаздар туралы сөз болғанда ерекше мәнге ие. Мұғалім бүгінгі нәтижемен ғана шектелмей, болашақ үшін еңбек етеді. Оның берген білімі, тәрбиесі, өмірлік құндылықтары мен жеке үлгісі шәкірттерінің жадында ұзақ жылдар сақталады. Осындай мамандыққа адалдықтың жарқын үлгісі – Ибраимовтар әулетінің педагогикалық династиясы.
Осы әулеттің өкілдерінің бірі – аудандық білім бөлімінің басшысы Ибраимов Асет Садвақасұлы. Оның білім беру саласындағы кәсіби жолы 1996 жылы Үшарал қазақ гимназиясында алғашқы әскери дайындық пәні бойынша директордың орынбасары қызметінен басталған. Еңбек жолында білім беру жүйесінің түрлі сатыларынан өтті: әдіскер болып жұмыс істеді, М. Мынбайұлы атындағы және І. Жансүгіров атындағы орта мектептерді басқарды, АГТК директоры қызметін атқарды. 2021 жылғы 6 қыркүйектен бастап Асет Садвақасұлы аудандық білім бөлімін басқарып келеді.
Оның білім беру саласында еңбек еткеніне бірнеше онжылдық болды. Осы уақыт ішінде мол педагогикалық әрі басқарушылық тәжірибе жинақтады. Алайда бұл отбасының ерекшелігі – мамандыққа деген сүйіспеншілік пен ұстаз еңбегіне деген құрметтің ұрпақтан-ұрпаққа жалғасуында.
Бүгінде Ибраимовтар әулетінің өкілдері білім беру саласының әртүрлі бағыттарында еңбек етіп келеді. Солардың бірі – Асет Садвақасұлының жұбайы Ақжолова Алия Матаевна. Ол А. Байтұрсынұлы атындағы орта мектепте технология пәнінің мұғалімі болып жұмыс істейді. Педагогикалық еңбек өтілі 15 жыл, біліктілігі – педагог-сарапшы. Асет Садвақасұлының қызы Ибраимова Асель Асетовна І. Жансүгіров атындағы орта мектепте ағылшын тілі пәнінің мұғалімі болып еңбек етеді. Оның біліктілік санаты – педагог-зерттеуші, педагогикалық еңбек өтілі – 19 жыл. Әулет тарихында оның әпкесі Ибраимова Ратай Садвақасқызының орны ерекше. Оның еңбек жолы 1982 жылы басталған. 44 жылдық кәсіби қызметінде орыс тілі пәнінің мұғалімі, директордың орынбасары, аудандық білім бөлімінің инспекторы қызметтерін атқарды. 2003 жылдан бастап зейнет демалысына шыққанға дейін Үшарал қазақ гимназиясының директоры болды. Бүгінде де оның тәжірибесі мен білімі сұранысқа ие. Ратай Садвақасқызы – педагог-зерттеуші, «ҚР білім беру ісінің үздігі» Педагогикалық дәстүрді тағы бір әпкесі – Закирова Мирангуль Садвақасқызы жалғастырып келеді. Ол – жоғары санатты орыс тілі мен әдебиеті пәнінің мұғалімі. Педагогикалық еңбек өтілі – 28 жыл. Әулеттің тағы бір мүшесі – күйеу баласы Закиров Бақытжан Бекмұқашұлы. Ол 1993 жылдан бері Үшарал қазақ гимназиясында еңбек етіп келеді. 33 жылдық қызметінде өзін оқушыларға білім беріп, тәрбие ісіне арнаған. Біліктілік санаты – педагог-зерттеуші.
Отбасылық дәстүрді жас ұрпақ та жалғастырып келеді. Асет Садвақасұлының жиендері де педагогика саласын таңдаған. Закирова Жангүл Бақытжанқызы – Үшарал қазақ гимназиясының түлегі. Семей қаласындағы Шәкәрім атындағы университетті «Биология» мамандығы бойынша тәмамдаған. Қазіргі уақытта А. Байтұрсынұлы атындағы орта мектептің тірек мектебі бойынша директордың орынбасары қызметін атқарады. Біліктілік санаты – педагог-сарапшы. Жас ұрпақтың тағы бір өкілі – Закирова Жанель Бақытжанқызы. Үшарал қазақ гимназиясын үздік бітіргеннен кейін Шәкәрім атындағы университетте «Ағылшын тілі» мамандығы бойынша білім алған. 2024 жылы Назарбаев Университетінің магистратурасын үздік тәмамдады. Бүгінде Жанель Бақытжанқызы Назарбаев Университетінде оқытушы болып қызмет етеді.
Асет Садвақасұлының жиені Ибраимов Анет Советовичтің де кәсіби қызметі білім беру саласымен байланысты. Ол І. Жансүгіров атындағы университеттің робототехника кабинетін басқарады және жас ғалым сертификатына ие.
Бұл отбасы өкілдерінің тағдыры – еңбектің жеке адамның кәсіби таңдауы ғана емес, отбасылық құндылыққа да айналуының жарқын үлгісі. Аға буын жас ұрпаққа тек мамандықты ғана емес, өз ісіне деген жауапкершілікті, тәртіпті, үнемі дамуға ұмтылысты және адамдарға пайдасын тигізуге деген ұстанымды да үйретіп келеді. Еңбек династияларының ерекше құндылығы да осында. Еңбек өтілінің жылдарында мыңдаған өткізілген сабақ, шәкірттердің тағдыры, кәсіби жетістіктер мен адамға деген ықылас жатыр. Әрбір ұстаздың жетістігінің артында марапатпен немесе көрсеткішпен өлшене бермейтін орасан зор күнделікті еңбек бар.
Еңбек күні – әртүрлі кәсіп иелеріне өз ісін адал атқарып жүргені үшін тағы да алғыс білдіретін мүмкіндік. Ал педагогикалық династиялар сабақтастықтың, өз ісіне адалдықтың және еңбекке деген құрметтің қаншалықты маңызды екенін көрсетеді.
Ибраимовтар – Закировтар әулетінің тарихы нағыз кәсібиліктің жұмыс күнінің аяқталуымен шектелмейтінін көрсетеді. Ол адамдарға деген қарым-қатынастан, нәтижеге деген жауапкершіліктен және жинақтаған тәжірибесін кейінгі ұрпаққа жеткізуге деген ұмтылыстан көрінеді. Әр адамның еңбегі сұранысқа ие болып, лайықты бағалансын. Осындай отбасылық еңбек династиялары мамандыққа деген адалдықтың, жауапкершіліктің және өз ісіне деген сүйіспеншіліктің жарқын үлгісі болып, жалғасын таба берсін.
Ш. Нукебаева
