Қазақстандық параспортшы Еркін Ғаббасов Айчи-Нагоя қаласында өтіп жатқан Азия Пара ойындарында ел қоржынына алғашқы алтын медальді салды, – деп хабарлайды 7-su.kz ақпараттық порталы.
Туризм және спорт министрлігі береген ресми дерекке сүйенсек, отандасымыз пневматикалық винтовкадан 10 метр қашықтыққа нысана көздеуден R1 дисциплинасы бойынша 249,1 ұпай жинап, қарсыластарынан озық шықты. Бұл нәтиже спортшымызға жарыс чемпионы атанумен қатар, турнир рекордын жаңартуға мүмкіндік берді. Оған қоса, Еркін осы жеңісі арқылы 2028 жылы Лос-Анджелесте өтетін Паралимпиада ойындарына тікелей жолдаманы қанжығасына байлады.
Шиеленісті өткен сайыста екінші орынды 248 ұпай жинаған оңтүстіккореялық Мерген Пак Джинхо иеленсе, қола жүлде 226 ұпаймен оның отандасы Ли Джанхоға бұйырды. Қазақстан мергені шешуші сәтте салқынқандылық танытып, соңғы мүмкіндіктерде 0,1–1,1 ұпай айырмашылығымен алға суырылып шықты.
Айта кетейік, Еркін Ғаббасов бұған дейін де Паралимпиада ойындарында пара нысана көздеуден күміс жүлде иеленген болатын. Оның бұл жеңісі ел спортшыларының халықаралық аренадағы бәсекеге қабілеттілігін тағы бір мәрте дәлелдейді. Мұндай жетістіктер ерекше қажеттілігі бар азаматтарға үлкен жігер беріп, бұқаралық спортты дамытуға оң ықпал етеді.
