Панфилов ауданына қарасты Алтыүй ауылының тұрғындары табиғи газға қосылды. Жергілікті халық осындай тарихи сәттің куәсі болды. Шараға аудан әкімі Марат Сағымбек қатысып, тұрғындарды қуанышымен құттықтады.
– Ават, Ынтымақ, Сүптай, Надек, Ақкент, Керімағаш, Қызылжиде, Сарпылдақ, Ақарал және Жиделі атты он ауылда 108,6 шақырымдық желі арқылы 6900 тұрғынның үйіне газ тартылды. Аудандағы тағы 12 елді мекенде құрылыс-монтаждау жұмыстары жүргізілуде, ал газға қосу жұмыстарын жыл соңына дейін аяқтаймыз. Сонымен қатар тұрғындардың өтініштеріне сәйкес алты ауылға қатысты жобалық-сметалық құжаттама әзірленді. Тұрпан, Садыр және Диханқайрат ауылдарына арналған жобалар сараптаманың оң қорытындысын алып үлгерсе, Сарыбел, Басқұншы және Көктал-Арасан ауылдарының жобалары қарастырылуда. Құрылыс жұмыстарын 2027 жылы бастау жоспарланып отыр, – деген аудан әкімі салтанатты шараға жиналған көпшілікке ақжарма ниетін білдірді.
Алтыүй ауылының тұрғыны Гүлнар Иманбекова: «Біз үшін табиғи газдың келуі – нағыз мереке. Бұрын қыс мезгілі көмір мен отын сатып алу, пеш жағып, күлін тазалау сияқты жұмыстармен өтетін. Енді үйлеріміз жылы, таза әрі жайлы болады. Ауыл тұрғындарының атынан облыс және аудан басшылығына маңызды әрі қажетті жобаны жүзеге асырғаны үшін шын жүректен алғыс айтамын», – деп көптен күткен қуанышқа қатысты пікірін білдірді.
Айта кетейік, облыста газдандыру деңгейі 67,4 пайызға жетті. Газ инфрақұрылымы 115 елді мекенді қамтамасыз етуде. Сонымен қатар тағы 11 ауылда құрылыс жұмыстары жүргізіліп жатыр. Ал Панфилов ауданындағы 40 елді мекеннің 26-сы газдандыруға жатады. Былтыр 5,7 миллиард теңге бөлініп, ауқымды жұмыстар атқарылды. 13 ауылда құрылыс жұмыстары аяқталып, 178 шақырым құбыр желісі тартылды және 15 400 тұрғынның көгілдір отынға қолжетімділігі қамтамасыз етілді.
ӨЗ ТІЛШІМІЗ
