Адам баласы құрған әрбір мемлекет жеткен жетістігі мен шыққан биігін өткеніне қарап бағалайды. Осы тұрғыдан алғанда: «Қазақстан Республикасының бүгінгі бақытты күндері баянды болсын!» деп тілеулестік танытуға міндеттіміз. Себебі қазіргі ғаламға көз салсақ оңай табылады. Дүрбелеңге толы дүниенің әр тарапында бүлікке бүйрегі бұрып тұратындар бас көтеріп, қарапайым халықтың мазасын қашырған соғыс өртін тұтатып жатыр. Палестина, Иран, Израиль, Франция, Украина, Ресей сынды мемлекеттердегі әрқилы қақтығыстар мен ұрыстар осындай ойға жетелейді.
Ондай соғыстың бетінен аулақ, Орта Азияның кіндігінде жатқан еліміз өзгелерге ынтымақтың, бейбітшіліктің, ырыс-құт, бақ-берекенің үлгісіндей болып отырғаны жасырын емес. Тіпті, Екінші дүниежүзілік соғыстың тұсында жер аударылған түрлі ұлттар мен ұлыстар байырғы Ұлы Даланың заңды мұрагері – қазақ халқының жақсылығын көргені бесенеден белгілі. Бұл тарих. Алайда көршілес алыс-жақын мемлекеттердің азаматтары Ұлы Жібек жолының бойында жатқан елімізде бүгін нәпақа тауып, бала-шаға асырап отырғаны бұлтартпас дерек. Ендеше, баласына өзгенің мұң-мұқтажына көңіл аудартуды үйреткен қазақ дарқан пейіл тарылмасын, өткен-кеткенге бір үзім нанын ұсынған сақи көңіл жұтамасын!
Мен еліміз тәуелсіздік алған 1992-ші жылы дүниеге келген ұрпақпын. Бала күнімде көрген сәттермен салыстырып қарасам, бүгінгі кең-байтақ Қазақстан дамудың жаңа сатысын бағындырып, экономикалық көрсеткіштің биік дәрежесіне шықты. Оны қазіргі мектептен, балабақшадан, ауруханадан, спорт сарайынан байқау қиын емес. Бүгінгідей барлық мүмкіндікті менің қатарластарымның ұрпағы көріп жатыр. Ең бастысы еліміз аман, жұртымыз тыныш. Меніңше ең үлкен байлық осы.
Өзім жақсы білетін инклюзия саласын айтар болсам, Тәуелсіздіктің алғашқы жылдары түрлі жарақат алып, мүгедек болып қалған жандарға ешқандай қолдау берілмейтін. Тіпті, мүгедек арбасының өзі жетіспейтін. Ағаштан құрастырылған мүгедек арбасы талайлар үшін арман болды. Қазіргі «Инватакси» деген мүлде ойда жоқ. Енді бүгін соның бәрі нақты өмірдің жетістігі. Мен білетін тағдырлас жандар мемлекеттің қолдауын алып, денсаулығын қалпына келтіруге қажетті жеңілдіктердің, шипажайлардың, емдеуге қажетті түрлі аппараттардың, инклюзивті спорт орталықтарының қызығын көруде. Қажет болса мүгедектер үшін арнайы квоталар, гранттар қарастырылған. Соның бәрін мүмкіндігі шектеулі жандарға арналған «Асар» спорттық-сауықтыру орталығына алған жан ретінде айтарым, бүгінгі күнімізге шүкір, келер күндеріміз бұдан да жарқын бола берсін!
Президентіміз Қасым-Жомарт Тоқаевтың ықпал етуімен 25 қазан – Республика күні қалпына келтіріліп, тарихи әділдіктің орнағанын жетістіктің бір мысалына балар едім. 1990 жылы Қазақ КСР Жоғарғы кеңесі қабылдаған «Қазақ КСР-інің мемлекеттік егемендігі туралы декларация» ұлттық тарихымыздың нақты дерегі ретінде бүгінгі күніміздің тамырын тереңдете түседі. Ал, Қазақстан Республикасы өз Тәуелсіздігін жариялағанына, міне, 35 жыл өтіпті.
Еркіндік сүйгіш еліміздің Көк байрағы мәңгілікке желбіресін, тыныштық пен тұрақтылықтың, бейбітшілік пен ынтымақтың ғасырларға созылған ордасына айнала берсін!
Елдос Баялышбаев,
Қазақстан Республикасы
Құрылтайының
депутаты
