Мемлекет басшысы Қасым-Жомарт Тоқаев өзінің Жолдауында ерекше білім беру қажеттіліктері бар балаларға қолайлы жағдай жасауды басты басымдық ретінде жүктеген еді, – деп хабарлайды 7-su.kz ақпараттық порталы.
Аталған тапсырманы сапалы жүзеге асыру мақсатында елімізде инклюзивті білім беру жүйесін кешенді жаңғырту жұмыстары басталды. Бұл бастама қолжетімді инфрақұрылымды кеңейтуді, білікті маман тапшылығын азайтуды және балалардың қажеттіліктерін ерте анықтауды қамтиды. Балалардың сапалы білім алуына және қажетті кешенді қолдауға қолжетімділігін арттыру үшін еліміздің 20 өңірінде оңалту және сауықтыру кабинеттері бар жаңа форматтағы 20 инклюзивті мектеп-кешен салу жоспарланып отыр. Мұндай орталықтар балаларға тең дәрежеде тәрбие алып, әлеуметтік ортаға тез бейімделуіне зор мүмкіндік сыйлайды.
Сонымен бірге психологиялық-медициналық-педагогикалық консультациялар ашу нормативін қайта қарау көзделуде. Қазіргі таңда бір консультация 50 мың балаға есептелсе, бұл көрсеткішті 40 мың балаға дейін төмендету ұсынылып отыр. Мұндай жүйелі өзгеріс өңірлердегі консультациялар желісін кеңейтіп, балалар мен ата-аналар үшін мамандандырылған көмектің қолжетімділігін айтарлықтай арттырады. Жергілікті деңгейде көрсетілетін қолдау баланың дамуындағы ауытқушылықтарды ерте бастан анықтап, уақтылы педагогикалық әрі медициналық көмек көрсетуге жол ашады.
Арнайы және инклюзивті білім беру мәселелері 2026 жылғы 26 ақпанда Оқу-ағарту министрлігінің кеңейтілген алқа отырысында Премьер-Министрдің орынбасары тарапынан арнайы қарастырылды. Берілген тапсырмаларды орындау мақсатында жүйенің қазіргі жағдайына кешенді талдау жүргізіліп, Инклюзивті білім беруді дамытудың 2026–2030 жылдарға арналған ведомствоаралық кешенді жоспары әзірленді. Құжат алты министрлікпен толық келісіліп, бекітілді. Стратегиялық құжат әр баланың жеке қажеттіліктерін уақтылы анықтауға, кедергісіз білім беру ортасын қалыптастыруға және психологиялық-педагогикалық қолдаудың сапасын жаңа деңгейге көтеруге бағытталған.
Баланы қолдау оның қажеттіліктерін бастапқы кезеңнен анықтаудан басталады. Бұл ауқымды жұмыс баланың әлеуметтенуін, кәсіби бағдарлануын және дербес өмірге дайындалуын толық қамтиды. Оған қоса, министрлік кешкі мектептердің жұмысын ұйымдастыру және инклюзияны қолдау кабинеттерін дамыту мәселелерін қарастыруда. Тергеу изоляторларында ұсталатын кәмелетке толмағандардың білім алу құқығын қамтамасыз ету мәселесі де бақылауға алынды. Балалардың қауіпсіздігін арттыру үшін арнайы SMS-хабарлама жүйесін енгізу мүмкіндігі де зерделенуде.
Оқу-ағарту министрлігі мүдделі тараптармен сындарлы диалогқа ашық. Ортақ міндет – әр балаға тең мүмкіндік беріп, оның білім алуына, дамуына және әл-ауқатына қажетті жағдай жасау. Қабылданып жатқан реформалар әділетті әрі инклюзивті қоғам қалыптастырудың берік іргетасына айналады.
