Мемлекет жастарға зор қолдау көрсетіп, білім алып, спортпен кедергісіз айналысып, ғылым қуып, қоғамда мықты маман болып қалыптасуына бар жағдайды жасап келеді. Жаңа Конституция бұл мүмкіндіктердің тынысын кеңінен аша түскендей. Жастарға деген қолдау жан-жақты қарастырылған. Құжатта білім мен ғылымды дамытуға, инновацияны қолдауға, жас мамандардың кәсіби қалыптасуына және жұмыспен қамтылуына басымдық берілген.
Шет елде оқып, болмаса жұмыс істеп жүргендер «артыңда іздеуші елің барда, сенде нық қадам жасайды» екенсің деп жатады. Мемлекет әр азаматты өз қамқорлығына алып, оның қауіпсіздігіне жауап береді. Әсіресе, білім іздеп, ғылыммен айналысуды мақсат еткен жастарға деген қамқорлық айрықша. Көрген-білгеніңді, оқып түйгеніңді ел үшін пайдаға жаратудан асқан бақыт жоқ.
Білім, ғылым инновацияны дамытуға бірінші рет ата заңымызда арнайы баптар арналды. Бұл жастардың еңбек нарығында сұранысқа ие маман болып қалыптасуына тікелей әсер етеді. Жастар өз кезегінде бұл мүмкіндікті жіберіп алмауы тиіс. Ал мықты маман – ел келешегін қуатты ететін жан.
Жаңа заңдағы тағы бір ерекше тұс – еріктілерді арнайы тіркеу. Яғни ол жердегі жастардың волонтерлық бағытта жұмыс жасаған уақыттары арнайы еңбек өтілі болып саналатын болады. Бұл жастарға біршама қолдау деп айтуға толық негіз бар.
Бүгінде жетіліп, жан-жақты дамыған жастар ата-анасына қрай алмай жатады. Жаңа заңның 30-бабында жағдайы жетіп тұрған баласы өзінің ата-анасын қарауға, қамқорлығына алуға, оған жасы келген кезде қамқор болуға міндетті деп көрсетілген. Сондықтан бұл қазіргі қоғамда өте қажет. Ата-ана мен баланың арасындағы байланысты нығайтуға көмегін тигізеді.
Одан бөлек жаңа Конституцияда жас кәсіпкерлерге көмектесу, өзін-өзі жұмыспен қамтуға жағдай жасау, жас отбасыларды әлеуметтік қолдау және тұрғын үймен қамтамасыз ету мәселелері де қарастырылған.
Жаңа Конституция – бұл жай ғана заңдар жиынтығы емес, еліміздің болашағын айқындайтын стратегиялық бағдар әрі жаңа дәуірдің тынысы. Әділетті қоғам құруға жол ашқан бұл құжаттың негізгі мақсаты – билік тармақтарының теңгерімін күшейту және азаматтардың шешім қабылдау процесіне қатысуын арттыру. Ең маңыздысы – адам құқықтары мен бостандықтарының басымдыққа ие болуы.
Қайырхан АМАНДОСОВ.
