Жетісу өңірінде қалалық инфрақұрылымды жаңғырту және тұрғындарды жайлы баспанамен қамтамасыз ету бағытында маңызды халықаралық келісімдер жүзеге асырылып жатыр, – деп хабарлайды 7-su.kz ақпараттық порталы Kapital.kz сайтына сілтеме жасап.
KAZAKH INVEST ұлттық компаниясының басшысы Сұлтанғали Кенжеқұлов, Жаркент қаласының әкімі Айдар Исаев және қытайлық инвестор Ван Сянлун аумағы 134 гектарды құрайтын жаңа заманауи шағын аудан салу жобасын талқылады. Ауқымды жоба аясында көпқабатты тұрғын үйлер, әлеуметтік мекемелер, коммерциялық орталықтар мен әкімшілік ғимараттар бой көтереді. Іскерлік бастаманы өңірде «Novus City Development» жауапкершілігі шектеулі серіктестігі тікелей жүзеге асыруды қолға алып отыр. Қытайлық инвестор Ван Сянлун мырзаның айтуынша, аталған жоба оның компаниясы үшін Қазақстан аумағындағы алғашқы стратегиялық серіктестік қадамы.
Жаркент қаласының әкімі Айдар Исаевтың берген мәліметіне сәйкес, құрылыс жұмыстарының алғашқы кезеңі 13 гектар жер телімін қамтиды. Осы бастапқы аумақты игеру арқылы жергілікті тұрғындар үшін 1 мыңнан астам жаңа жұмыс орны ашылады. Жалпы жоспар бойынша эконом және бизнес-кластағы 7 мыңнан астам заманауи пәтер пайдалануға беріледі. Тұрғын үйлердің халыққа қолжетімді болуын қамтамасыз ету мақсатында экінші деңгейлі банктермен және «Отбасы банк» акционерлік қоғамымен тығыз ынтымақтастық орнату көзделіп отыр. Жаңа шағын аудан өңірдегі тұрғын үй кезегін айтарлықтай қысқартып, халықтың тұрмыс сапасын жақсартуға оң ықпал етеді.
Еске сала кетейік, Мемлекет басшысы Қасым-Жомарт Тоқаев Қазақстан халқына арнаған Жолдауында «Халықтық құрылыс» бағдарламасын іске қосуды тапсырған болатын. Ауқымды бағдарлама аясында еліміздің барлық өңірлерінде 70-ке жуық денсаулық сақтау нысаны, соның ішінде перзентханалар, ауруханалар, жедел жәрдем станциялары, балаларды оңалту орталықтары мен спорт залдары салынады. Сонымен бірге 50-ге жуық білім, спорт және мәдениет мекемесінің құрылысы басталады. Үкіметке жыл соңына дейін барлық аймақтарды қамтитын нақты жобалардың бастапқы тізбесін әзірлеу тапсырылды.
Сонымен қатар Президент 2029 жылдың соңына дейін Ұлттық қордан әлеуметтік-экономикалық маңызы бар нысандарды салуға және жаңғыртуға 6.5 трлн теңге бөлуді міндеттеді. Жаркентте қолға алынған заманауи жоба осы стратегиялық тапсырмалардың өңірдегі практикалық көрінісі.
