Жетісу облысына жұмыс сапарымен Құрылтай депутаты Екатерина Смолякова, ҚР Ауыл шаруашылығы вице-министрі Назгүл Хатепова және ҚР Қаржы вице-министрі Дәурен Темірбеков келді. Сапар аясында мәртебелі қонақтар өңірдің белсенді жастарымен кездесіп, Мемлекет басшысы Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауының негізгі бағыттарын жан-жақты талқылады.
Меймандар Талдықорған қаласындағы «Жетісу жастары» ғимаратына арнайы барып, орталықтың тыныс-тіршілігімен танысты. Жастардың басын біріктіріп, олардың қоғамдық өмірге белсене араласуына жол ашатын мекеменің жұмыс барысына назар аударды. Сондай-ақ жұмыс кабинеттерін аралап, жас буынға арналған түрлі бағыттағы жобалар мен бастамалардың жүзеге асырылу барысымен танысты.
Бұдан кейін жастармен мазмұнды кездесу өтіп, онда Президент Жолдауында көтерілген маңызды мәселелер кеңінен сөз болды. Қонақтар құжаттың негізгі бағыттарына жеке-жеке тоқталып, ел дамуының жаңа кезеңіндегі басым міндеттерді түсіндірді. Әсіресе, білім беру, ғылым мен инновация, цифрландыру, жасанды интеллект, еңбек нарығы, кәсіпкерлік және ауыл шаруашылығын дамыту мәселелеріне ерекше назар аударылды.
Кездесу барысында Мемлекет басшысы айқындаған міндеттердің әрқайсысы еліміздің алдағы даму бағдары үшін маңызды екені атап өтілді. Қазіргі таңда әлемде технологиялық өзгерістер қарқын алып, еңбек нарығына қойылатын талаптар да жаңарып келеді. Осындай жағдайда жастардың сапалы білім алып, заманауи мамандықтарды меңгеруі, кәсіби біліктілігін үнемі жетілдіріп отыруы айрықша мәнге ие. Қонақтар өскелең ұрпақты уақыт талабына сай білім мен дағдыны игеруге, жаңа мүмкіндіктерді тиімді пайдалануға шақырды.
Білім мен ғылым тақырыбына тоқталған кезде жастардың зияткерлік әлеуетін арттыру, ғылыми ізденіске қызығушылығын ояту, озық технологияларды меңгеру мәселелері қозғалды. Әсіресе, жасанды интеллект пен цифрлық шешімдердің түрлі салаға еніп жатқанын ескерсек, бұл бағытта білімді ұрпақ қалыптастырудың маңызы зор. Жастардың IT саласына бет бұрып, тың жобалар әзірлеуі мен инновациялық бастамаларды қолға алуы елдің бәсекеге қабілеттілігін арттыруға ықпал ететіні айтылды.
Ауыл шаруашылығы вице-министрі Назгүл Хатепова аграрлық секторды дамыту бағытындағы міндеттерге тоқталды. Атап айтқанда, ауыл шаруашылығын жаңғырту, өндіріске заманауи технологияларды енгізу, еңбек өнімділігін арттыру және ауылдық жерлердің әлеуетін тиімді пайдалану мәселелері сөз болды. Бұл ретте жастардың ауыл шаруашылығы саласына қызығушылығын арттыру, аграрлық мамандықтарды меңгеруіне жағдай жасау және ауылдық жерлерде кәсіпкерлік бастамаларды дамыту қажеттігі де назарға алынды. Себебі ауылдың дамуы мен азық-түлік қауіпсіздігін қамтамасыз етуде жас мамандардың үлесі айрықша.
Ал Қаржы вице-министрі Дәурен Темірбеков қаржы саласындағы басым бағыттар мен мемлекеттік қаражатты тиімді пайдалану мәселелерін түсіндірді. Қаржылық тәртіп пен жауапкершіліктің маңызына тоқталып, жастардың қаржылық сауаттылығын қалыптастыру қажеттігі де әңгімеге арқау болды. Жеке қаражатты дұрыс басқару, қаржылық жоспарлау, кәсіп бастау кезінде экономикалық сауаттылықты ескеру – бүгінгі жас буын үшін маңызды дағдылардың бірі. Өйткені қаржылық сауатты азамат өзінің ғана емес, қоғамның да экономикалық дамуына үлес қоса алады.
Өз кезегінде Құрылтай депутаты Екатерина Смолякова Жолдауда белгіленген міндеттердің қоғам өміріндегі маңызына тоқталып, жастардың ел болашағын қалыптастырудағы рөлін атап өтті. Жас буынның қоғамдық жұмыстарға араласуы, азаматтық ұстанымын қалыптастыруы, елдегі өзгерістер мен жаңашылдықтарға белсенді қатысуы қажеттігі айтылды. Сондай-ақ жастардың ұсыныстары мен бастамаларын қолдау, олардың әлеуетін ашуға мүмкіндік беру мәселелері де назардан тыс қалмады.
Жүздесу барысында жастар да өздерін толғандырған сауалдарын қойып, ұсыныс-пікірлерін ортаға салды. Қонақтар қойылған сұрақтарға жауап беріп, жастардың бастамалары мен көзқарастарына қатысты ой бөлісті. Әсіресе, жас мамандарды жұмыспен қамту, кәсіпкерлікке қолдау көрсету, білім алу мүмкіндіктерін кеңейту, ауыл жастарының әлеуетін арттыру және жаңа технологияларды меңгеру мәселелері төңірегінде пікір алмасты. Ашық форматта өткен әңгіме қатысушыларға өз ойларын еркін жеткізіп, көкейдегі сауалдарына жауап алуға мүмкіндік берді.
Кездесуде жастардың тек білім алып, мамандық игерумен шектелмей, ел өміріндегі маңызды бастамаларға да белсене араласуы қажеттігі айтылды. Өйткені бүгінгі жас – ертеңгі білікті маман, кәсіпкер, ғалым, мемлекеттік қызметші және қоғам қайраткері. Сондықтан олардың бойында отансүйгіштік, еңбекқорлық, жауапкершілік пен бастамашылдық қасиеттерді қалыптастыру маңызды.
Басқосуда Жолдауда көтерілген міндеттерді жүзеге асыруда жастардың да өзіндік жауапкершілігі бар екені сөз болды. Елдегі өзгерістерді сырттай бақылап қана қоймай, білім мен еңбектің арқасында нақты нәтижеге қол жеткізу, қоғамдық бастамаларға атсалысу, туған өлкенің дамуына үлес қосу – әрбір жас азаматтың ортақ мақсатына айналуы тиіс. Осы тұрғыдан алғанда, жастармен мұндай кездесулердің маңызы зор. Себебі ашық пікір алмасу арқылы жас буын мемлекеттік саясаттың басым бағыттарын тереңірек түсініп, өздерін толғандырған мәселелерді тікелей сала өкілдеріне жеткізе алады.
Жалпы, басқосудың басты ерекшелігі – Жолдауда көтерілген ауқымды міндеттердің жастардың күнделікті өмірімен, білім алуымен, кәсіби қалыптасуымен және болашақ жоспарларымен сабақтастыра түсіндірілуі болды. Бұл өз кезегінде жас буынның ел дамуындағы өзгерістерді тереңірек түсінуіне, өз мүмкіндіктерін бағамдап, алдағы мақсаттарын айқындауына жол ашады.
Елдің ертеңі – білімді, бәсекеге қабілетті, жаңашылдыққа бейім әрі жауапкершілігі жоғары ұрпақтың қолында. Жастарға сенім арту, олардың бастамаларына қолдау көрсету және қоғамдық өмірге белсенді араласуына мүмкіндік жасау – мемлекет дамуының маңызды шарттарының бірі. Жетісуда өткен бұл кездесу де жас буын мен мемлекеттік органдар өкілдері арасындағы ашық диалогты нығайтып, ел болашағына қатысты өзекті мәселелерді ортақ талқылауға мүмкіндік берген тағылымды жүздесу болды.
Айгүл БАЙБОСЫН
