Қазақстанда азаматтардың қаржылық айналымын ашық ету, көлеңкелі экономиканы азайту және салық саясатын цифрландыру бағытында заманауи платформалар белсенді қолданысқа енгізілуде, – деп хабарлайды 7-su.kz ақпараттық порталы Tengrinews.kz сайтына сілтеме жасап.
Елімізде салық төлеушілер туралы әртүрлі дереккөздерден алынған мәліметтерді бір арнаға біріктіретін Smart Data Finance цифрлық жүйесі өнеркәсіптік пайдалану режимінде жұмыс істеуде. Қаржы министрлігінің аталған талдау платформасы жеке және заңды тұлғалардың салықтық цифрлық құжаттамасын қалыптастырады. Жүйеге жылжымайтын мүлік, автокөліктер, жер учаскелері, бағалы қағаздар, еңбек шарттары, нотариалды іс-әрекеттер,сондай-ақ мобильді аударымдар мен өзге де қаржылық операциялар туралы ақпарат автоматты түрде түседі.Мәліметтерді өңдеуде Big Data, жасанды интеллект және машиналық оқыту технологиялары кеңінен қолданылуда.
Мемлекеттік кірістер комитетінің өкілдері азаматтардың кірістері мен шығыстарын салыстыру камералдық бақылау шеңберінде тұрақты түрде жүргізілетінін хабарлайды. Камералдық бақылау фискалдық органдардың салық төлеушіге бармай-ақ, мемлекеттік базалар арқылы сәйкессіздіктерді анықтауға мүмкіндік береді. Егер декларацияда көрсетілген кіріс мөлшері тіркеуге жататын қымбат мүлікті немесе шетелдегі активтерді сатып алуға жұмсалған шығыстардан аз болса, жанама әдістер қолданылады. Мұндай салықтық әкімшілендіру декларацияланбаған кірістерді анықтауға бағытталған. Салық мамандарының камералдық бақылау қорытындысы бойынша елімізде 322 млрд теңге салық қосымша есептелді.
Егер цифрлық құжаттамадан мүлікке қатысты қате мәліметтер табылса, азаматтар тиісті мемлекеттік органға жүгінуі тиіс. Мысалы, автокөлікке қатысты қателіктер анықталса, Ішкі істер министрлігінің базасындағы деректерді түзеткен жөн. Бастапқы жүйеге өзгеріс енгізілгеннен кейін Smart Data Finance платформасындағы ақпарат келесі күні жаңарып отырады. Техникалық іркілістер орын алғанымен, комитет өкілдері салық төлеушілерге қате хабарламалар жіберілмей тұрып, олқылықтардың жойылатынын алға тартады.
