Талдықорғанда полиция қызметкерлері заманауи бейнеталдау технологиялары мен бет-әлпетті тану жүйесінің көмегімен тұрғынның жоғалған алтын білезігін тауып, иесіне қайтарды, – деп хабарлайды 7-su.kz ақпараттық порталы Жетісу облысы Полиция департаментіне сілтеме жасап.
Қала тұрғыны алтын әшекейінің жоғалғанын байқап, полицияға жүгінген. Өтініш негізінде жедел-криминалистикалық басқарма мамандары іске кірісіп, бейнежазбаларды зерделеу барысында заманауи цифрлық жүйелерді пайдаланған. Нәтижесінде білезіктің орналасқан жері анықталып, тергеу-жедел тобының үйлесімді жұмысының арқасында бұйым заңды иесіне қайтарылды.
Полиция мәліметінше, аталған жүйе өңірде құқық бұзушылықтардың алдын алу мен оларды анықтау бағытында да қолданылып келеді. Жыл басынан бері оның көмегімен 85 тексеру жүргізіліп, қылмысқа қатысы бар 22 адам анықталған. Сонымен қатар әкімшілік құқық бұзушылық жасаған 12 тұлға белгілі болған.
Заманауи бейнеталдау және сәйкестендіру технологиялары полиция жұмысының жеделдігін арттырып қана қоймай, тұрғындардың жоғалған мүлкін іздестіруге де мүмкіндік беріп отыр.
