Жетісу өңірінде транспорттық инфрақұрылымды дамыту, жолаушыларға арналған жағдайды жақсарту және ауылдық елді мекендердің көлік қатынасын заман талабына сай ету бағытында маңызды жобалар іске асуда, – деп хабарлайды 7-su.kz ақпараттық порталы.
Жетісу облысында 1999 жылы іске қосылған Жайпақ станциясының теміржол вокзалын қайта жаңғырту жұмыстары сәтті аяқталды. Ауқымды жөндеу нәтижесінде вокзал ғимараты түбегейлі жаңарып, жолаушылар инфрақұрылымы толық абаттандырылды. Аталған нысанды жаңарту Мемлекет басшысының тапсырмасы бойынша жүзеге асырылып жатқан еліміздегі 124 теміржол вокзалын реконструкциялау және жаңғырту бағдарламасы аясында орындалды. Жаңартылған ғимараттың жалпы ауданы 105 шаршы метрді құрайды. Құрылыс барысында ғимараттың қасбеті сәндік сылақпен әрленіп, іргетасының сыртқы бөлігі мықты гранитпен қапталды, ал ішкі едендерге керамогранит төселді.
Жаңғырту кезінде қауіпсіздік талаптарына да ерекше мән берілген. Қосымша эвакуациялық жолдар жабдықталып, өртке төзімді арнайы есіктер орнатылды. Барлық құрылыс-монтаждау жұмыстарына тек отандық өндіріс материалдары пайдаланылды. Жайпақ станциясы III санатқа жатады. Бүгінде аталған станция арқылы Достық және Жалаңашкөл бағыттарымен қатынайтын екі жолаушылар пойызы тұрақты түрде жүреді. Теміржол инфрақұрылымын цифрландыру және жаңғырту шаралары жолаушыларға қызмет көрсету сапасын 20-30 пайызға арттыруға мүмкіндік береді. Мұндай оң өзгерістер өңір аралық қатынайтын азаматтар үшін қолайлы орта қалыптастырады.
