Мемлекет басшысының Қазақстан халқына арнаған Жолдауы – еліміздің алдағы даму бағыттарын айқындайтын маңызды стратегиялық құжат. Онда көтерілген мәселелер мен белгіленген міндеттер қоғамның барлық саласы үшін, соның ішінде дене шынықтыру және спорт саласы үшін де ерекше маңызға ие.
Менің ойымша, ел болашағының негізі – дені сау, білімді, белсенді әрі отансүйгіш ұрпақ тәрбиелеу. Осы тұрғыда бұқаралық спортты дамыту, балалар мен жасөспірімдердің спортпен тұрақты айналысуына жағдай жасау, спорт инфрақұрылымын жетілдіру – уақыт талабынан туындаған маңызды міндеттер.
Бүгінде спорт тек жарыс пен жеңістің көрсеткіші емес, ол – ұлт денсаулығының, тәртіп пен табандылықтың, ел бірлігінің көрінісі. Әсіресе, өңірлерде балалар спортын дамытуға, жас таланттарды анықтап, олардың кәсіби деңгейде өсуіне мүмкіндік жасауымыз қажет. Бұл бағытта спорт мектептерінің, жаттықтырушылардың және сала мамандарының жауапкершілігі зор.
Жолдауда айтылған міндеттерді жүзеге асыру әрбір азаматтан нақты іс пен белсенділікті талап етеді. Сондықтан біз де өз саламызда белгіленген басымдықтарды басшылыққа алып, жас ұрпақтың сапалы спорттық білім алуына, салауатты өмір салтын қалыптастыруына және Жетісу өңірінің спорттық әлеуетін арттыруға үлес қоса береміз.
Ел дамуы – әрқайсымыздың ортақ жауапкершілігіміз. Бүгінгі жасалған еңбек – ертеңгі жарқын болашақтың кепілі.
Мерей Суюнов
Жетісу облыстық мамандандырылған балалар-жасөспірімдер спорт мектебінің басшысы





