Мемлекет басшысы Қасым-Жомарт Тоқаев халыққа Жолдауында қалаларды қауіпсіз, тұрғындарға жайлы, экономикасы дамыған, әлеуеті зор шаһарға айналдыру керектігіне тоқталды. Қалаларды дамыту – мемлекет саясатының басым бағыттарының бірі.
Президент бұл бағыттағы тапсырмалары еліміздің экономикалық әлеуетін арттырып қана қоймай, азаматтардың тұрмыс сапасын жаңа деңгейге көтеруге бағытталғанын айтты. Мемлекет басшысы атап өткендей, ауыл-аймақтарды қолдау мен дамыту әрдайым ерекше бақылауда болады. Дегенмен, қазіргі жаһандық үрдістер мен заман талабы экономиканың, білім мен озық технологияның негізгі тірегі – қала. Қуатты қалалар – қуатты аймақтардың, ал қуатты аймақтар күшті мемлекеттің іргетасы. Осы мақсатта әр қаланың Үкімет бекіткен нақты орта және ұзақ мерзімді даму жоспары болуы міндеттелді.
Қалалардың ресурс базасын тиімді басқару, инфрақұрылымды жаңғырту және басқару процестерін оңтайландыру мақсатында Үкімет әкімдіктермен бірлесіп қала инфрақұрылымының цифрлық сыңарын (Digital Twin) көп ұзамай әзірлеуге тиіс. Бұл қала тіршілігін цифрлық форматта бақылап, шешімдерді жедел әрі дәл қабылдауға мүмкіндік береді.
Қалаларды қауіпсіз, жайлы әрі көрікті ету – бұл жай ғана абаттандыру жұмысы емес, маңызды мемлекеттік міндет. Бұл бастама елімізде жүзеге асырылып жатқан «Таза Қазақстан» жалпыұлттық тұжырымдамасының талаптарымен толық үндеседі. Өйткені қала қарқынды дамыған сайын, сол өңірдің экономикасы өркендеп, адами әлеуеті артып, халықтың әл-ауқаты түбегейлі жақсара түседі.
Мади БОЛАТОВ.





