Павлодарда өткен республикалық форумда кәсіподақтар еңбек құқығы мен әлеуметтік қорғауға қатысты 25 бастаманы Қазақстан Халық Кеңесіне табыстады, – деп хабарлайды 7-su.kz ақпарттық порталы.
19 қарашада Павлодарда «Еңбек адамы – Ел бірлігінің тірегі» атты кәсіподақтар форумы өтті. Жиынға Қазақстан Кәсіподақтар федерациясының төрағасы Сатыбалды Дәулеталин, Қазақстан Халық Кеңесінің төрағасы Ерлан Қошанов, облыс әкімі Асайын Байханов, сондай-ақ салалық бірлестіктер мен еңбек ұжымдарының өкілдері қатысты.
Форумда «Еңбек адамының үні» құжаты таныстырылды. Бастамалар бес бағытқа бөлінген: әділ табыс пен әлеуметтік әріптестік, еңбек қауіпсіздігі, еңбек ететін отбасының әл-ауқаты, технологиялық өзгерістер кезіндегі жұмыспен қамту және қоғамдық өмірге қатысу. Кәсіподақтар 2027 жылдың 1 қаңтарынан бастап ең төменгі жалақыны 85 мыңнан 110 мың теңгеге өсіру шешімін қолдап, нақты табыстың тұрақты артуына басымдық беруді ұсынды.
Өндіріс пен цифрландыру мәселелері де назардан тыс қалмады. Сала өкілдері жалақыны инфляцияға сай жыл сайын индексациялауды, жасанды интеллект енгізілгенде қызметкерлерді қайта оқыту мен жұмыс орнын сақтауды, демалыс уақытында байланыстан ажырау құқығын және техникалық инспекторлардың өкілеттігін күшейтуді көтерді. Бюджет саласында тәлімгерлік үшін лауазымдық жалақының кемінде 20-25 пайызы көлемінде үстемақы белгілеу, ал моноқалаларда жас мамандарға баспана қолдауын кеңейту бастамалары айтылды. Кәсіби аурулардың алдын алу үшін келесі жылы медициналық жабдыққа 1 млрд теңгеден астам қаржы қарастырылып, өңірлерде филиалдар ашу жоспарланған.
Кездесу қорытындысында бастамаларды пысықтау үшін Халық Кеңесі жанынан «Еңбек дауысы» жұмыс тобын құру ұсынылды. Құжаттағы ұсыныстар үшжақты комиссиялар мен мемлекеттік органдардың қатысуымен қаралмақ.






