Биыл облыста 13,7 мың гектар жерге қант қызылшасы егілді. Қазір 11,5 мың гектары қазылып, 545 мың тонна өнім алынды. Қалған 2,2 мың гектар алқапта жиын-терін жұмысы жүйелі жүргізілуде. Тәтті түбірді қазу үшін 80 комбайн жұмылдырылған. Облыс аумағындағы екі зауыт күн сайын орта есеппен қант қызылшасы тиелген 250 автокөлікті қабылдап жатыр.
Облыстық ауылшаруашылық басқармасының 18 қарашада берген мәліметі бойынша зауытқа 445 мың тонна өнім өткізілген. Оның 212 мың тоннасын Көксу, 233 мың тоннасын Ақсу қант зауыттары қабылдады. Ақсу қант зауытына Жамбыл облысынан 29 мың тонна қант қызылшасы жеткізілген.
Облыстық ауылшаруашылық басқармасының басшысы Нұрдәулет Кененбаевтың айтуынша, қазылған қызылшаның 100 мың тоннасы шаруашылықтардың егістік алқаптарындағы буртта жинақталған. Ал қазылатын 2,2 мың гектардан 95 мың тонна қызылша жиналады деп күтілуде. Жалпы облыс бойынша 640 мың тонна қызылша жиналады деген жоспар бар.
– Биыл қант қызылшасына берілетін субсидия көлемі ұлғайтылып, тәтті түбір өсірудің табыстылығы өсіп, шаруалардың дәл осы өнімді өсіруге деген қызығушылығы артты. Жоспарлаған 10,7 мың гектар жердің көлемі 13,7 мың гектарға жетті. Өнімді жинау және қабылдау 15 қыркүйектен басталды. Қазір 2 зауыт бекітілген кестеге сәйкес күнделікті жалпы 5 мың тонна қант қызылшасын қабылдап отыр, – дейді облыстық ауылшаруашылығы басқармасының басшысы Нұрдәулет Кененбаев.
Қос ауданда орналасқан зауытқа қант қызылшасын өткізу үшін кезекте тұрған көлік жүргізушілеріне қолайлы жағдай жасалуда. Ауданның белсенді жастары, еріктілері оларды ыстық тамақпен қамтамасыз етуде.
Егін шаруашылығына, қант қызылшасының өндірісіне мемлекет тарапынан жан-жақты қолдау көрсетілуде. Атап айтсақ, биыл облыста егін шаруашылығы бағытына жалпы 14 млрд. теңге бөлінген. Оның 9,7 млрд. теңгесі басым дақылдарды субсидиялауға, 2,6 млрд. теңгесі минералды тыңайтқыштарды, 1,2 млрд. теңгеге жуығы тұқымдарды, 483 млн. теңгеге жуығы пестицидтерді субсидиялауға қарастырылды. Көктемгі дала және өнімді жинау жұмыстарына 11 мың тонна арзандатылған дизель отыны бөлінді.
5 ауданда жаңа 8 сервистік-дайындау орталығын құруға 2,5 млрд. теңге бөлініп, 62 бірлік себу және өнімді жинау техникасы шаруашылықтарға лизингке берілді. Бұл облыстық бюджет есебінен қаржыландырылды.
Бүгінге дейін шаруашылықтарға қабылдаған өнім үшін Көксу қант зауыты1,4 млрд. теңге, Ақсу қант зауыты 1,9 млрд. теңге төлеген. Ауылшаруашылығы басқармасы тарапынан шаруашылықтардан түскен 160 өтінім бойынша 3,1 млрд. теңге субсидия қарастырылған. Зауыттардың шаруалармен есеп айырысуы мен өткізілген өнімді субсидиялау шаруашылық өтінімдерінің түсуіне байланысты жүзеге асады.
Еңлік КЕНЕБАЙ
