Халықтың өмір сүру сапасына тікелей әсер ететін ауылшаруашылық саласының жетістігі көп. Мемлекет қолдауының нәтижесінде бұл сала жаңа деңгейге көтерілді. Алдағы уақытта осы бағыттағы жұмыстар жүйелі атқарылса, ел экономикасының дамуына, халықтың әл-ауқатының артуына септігін тигізеді.
Нәсібін қасиетті қара жерден жиған еңбеккерлердің еңбегі ерен. Диқаншылар ала жаздай бел жазбай киелі жерден мол өнім алуды ойлап, тынымсыз тер төксе, малшылар төрт түліктің санын арттыру мақсатында күндіз-түні аттан түспей, еңбек етуде. Тынымсыз тіршіліктің арқасында ғана отандық аграрлық сектор күннен күнге дамып келеді. Қысқасы, төскейінде төрт түлігін өсірген малшылар мен алқабында егінін жайқалтқан диқаншылар қауымының, жалпы ауылшаруашылығы саласының дамуына өлшеусіз үлес қосқан жандардың ерен еңбегінің нәтижесінде биыл облыстың көрсеткіші көңіл қуантады.
Қант қызылшасымен танылған жер жаннаты Жетісу аймағының ауылшаруашылық саласында да біршама даму мен жетістік бар. Ауылшаруашылығы жерлерін пайдалану мен бөлуде облыс аумағында ашықтық пен тиімді механизмі қолданылды. Ауылшаруашылық өнімдерін өндірушілерді қолдап, олардың өнімдерінің өту мүмкіндігін кеңейту үшін барлық жағдай қарастырылған. Ең бастысы – шаруалар заманауи техникалар алып, технологияны меңгеріп, жұмысты нәтижелі атқаруда. Осы тұста «Ауыл» партиясының экономикалық стратегиясы Қазақстанды аграрлық державаға айналдыруға негізделгенін ерекше атап өткім келеді.
Қазақстанның аграрлық державаға айналуы агроөнеркәсіптік кешен мен ауылдық аймақтар әлеуетін толық ашатын жағдайды қалыптастыру арқылы қамтамасыз етіледі. Мемлекеттің ақша-несие, салық және кедендік-тарифтік саясаты ауылшаруашылығын дамытуға бағытталады. Бұл ауылда өмір сүру мен жұмыс істеу жағдайларын жақсартуға ерекше назар аударылып, айрықша ресурстар жұмсалды. Аталған қағидат ауылшаруашылығын дамытуға арналған шаралар, фермерлер мен кәсіпкерлерді қолдауға, ауыл инфрақұрылымына, білім беру мен денсаулық сақтау салаларын инвестициялауға, сонымен бірге ауыл жастары үшін жаңа жұмыс орындарын ашып, мүмкіндік жасайтын уақыт келгенін ұмытпағанымыз жөн.
Президент Қасым-Жомарт Тоқаев ауылшаруашылығы саласының басты міндеті – елімізді негізгі азық-түлік өнімімен толық қамтамасыз ету екенін атап көрсетті. Сондықтан осындай еңселі еңбектің майданында жүрген майталмандар қандай құрметке де лайықты. Осы мерейлі мереке қарсаңында адал еңбек етіп жүрген азаматтардың қамбалары астыққа, шаңырақтары шаттыққа толсын деп тілек айтқым келеді.
Айбек ИСКАКОВ,
«Ауыл» партиясы Жетісу облысы бойынша өңірлік филиалының төрағасы,
облыстық мәслихаттың депутаты
Фото: gov.kz
