Черногория елінің Будва қаласында бокстан жастар арасында өткен әлем чемпионаты өз мәресіне жетті. Жарысқа 73 мемлекеттен 600-ге жуық спортшы қатысты.
Байрақты бәсекеде Қазақстан құрамасы жалпыкомандалық есепте топ жарды. Дүбірлі додада ел құрамасы 17 медаль (алты алтын, бір күміс және он қола) жеңіп алды. Ұлт абыройын асқақтатқандардың қатарында облыстың былғары қолғап шеберлері де бар. Атап айтсақ, Аружан Зейноллаева 81 келі салмақта қарсыластарын қоғадай жапырып, жеңістің желкенін көтерсе, Диас Берікбай 48 келі салмақта қола жүлдені қанжығасына байлады.
Осыған орай, Жетісу жұртшылығы Талдықорғандағы әуежайға жиналып, толағай табысқа жеткен спортшыларды құшақ жая қарсы алды. Шараға жиылған халық жеңімпаздардың құшағын гүлге толтырып, ізгі тілектерін білдірді. Айта кетейік, Алакөл ауданы, Көлбай ауылында туған Аружан Зейноллаева Сидней олимпиадасының жеңімпазы Бекзат Саттархановты еске алуға арналған халықаралық турнирдің, ел біріншілігінің жеңімпазы және жасөспірім қыздар арасындағы Азия чемпионатының күміс жүлдегері. Ал Диас Тұнықұлы Бекзат Саттархановты, ҚазКСР-не еңбек сіңірген жаттықтырушы Кеңес Омаровты еске алуға арналған халықаралық турнирінің жеңімпазы.
«Жетісу-Ақпарат»
