Шаруалар қазір жаз бойы өсіріп, өндіргендерін жинап, күз берекесін тасытуда. Облыстық ауылшаруашылығы басқармасы басшысының орынбасары Бахтияр Шампиковтың айтуынша, биыл жүгеріге арналған егіс алқаптарының көлемі 16 мың гектарға азайып, 41,1 мың гектарды құраған.
Жалпы, осы жыл соңына дейін 282-288 мың тонна дәндік жүгері жинау жоспарлануда. Бүгінгі таңда облыс аумағында «дала аруының» біраз бөлігі жиналып, ойдағыдай өнім алынуда.
Жүгері өсірумен айналысатын Панфилов ауданының шаруалары да бұл дақылды шауып, өнімді төкпей-шашпай жинап жатыр. Орташа өнімділігі 72,0 центнерден айналуда. Диқандар Жаркент крахмал-сірне зауытына 52 мың тоннадан аса өнім өткізген. Жалпы, биыл «дала аруын» жинау, өткізу бойынша мәселелер туындап отырған жоқ.
– Талдықорған қаласында Жетісу-Мажико зауыты іске қосылуда. Сол сияқты қайта өңдеу кәсіпорындарын кеңейту, салу нәтижесінде шаруаларға өз таңдауын жасауына жағдай туып, қалаған зауытымен жұмыс істеуге мүмкін болмақ. Сонымен бірге диқандар қандай дақыл өсіреді, өнімдерін тиімді бағаға қалай өткізеді? Біздің мақсат – осының бәріне қолұшын беру. Осы орайда инвесторлар іздестірілуде. Олардың ішінде өз ұсыныстарын айтып, талап-тілектерін білдіріп жатқандары да бар. Қазіргі кезде Талдықорған өңірінде дәндік жүгеріні терең өңдейтін зауыт ашу бағытында жұмыс жүргізілуде, – дейді Бахтияр Қалдыбатыр- ұлы.
Биыл шаруаларды қолдау мақсатында субсидия мөлшері 6 мыңнан 10 мың теңгеге дейін ұлғайып, бұл үшін облыстық бюджеттен 840 миллион теңге көлемінде қаражат қарастырылған.
Айгүл БАЙБОСЫНОВА
