Футбол елімізде айрықша қарқынмен дамып келеді. Бүгінде доп тебетін қаракөздердің қатары күн санап артуда. Олардың бұл спорт түріне деген қызығушылығына берілетін баға оң. Осы ретте облыс орталығында 5-6, 7-8, 9-11-сынып оқушылары арасында «Былғары доп» бәсекесі өтті.
Жарысқа 55 команда қатысты. Талдықорғанның өзінен 10 команда шықса қалғаны ауыл, аудандардан құралып отыр. Жасөспірімдердің шеберлікпен ойын өрнегін көрсетуі көрермендерді сүйсінтті. Олардың бұлай доп тебістері қазақ футболының болашығының жарқын көрсеткіші.
Бұл жарыстың мақсаты – жеткіншектерде дене шынықтыру нормаларын сақтау, саламатты өмір салтына құндылық бағдарын қалыптастыру, сондай-ақ, нашақорлыққа қарсы күрес және алдын алу.
Ала доп бәсекесі 2 күнге жалғасты. Мұнда қыздар командалары да бәсекеге түсті. Шара аясында облыс әкімінің орынбасары Марлен Көлбаев сөз сөйлеп, ұйымдастырылып отырған жарыстың мән-мазмұнын түсіндірді. Спорттың адам денсаулығына тигізер пайдасы орасан екенінен мағлұмат берді. Жас спортшыларға өмірде жарқын сәттер тілеп, жеңіс тұғырынан көрінулеріне тілектес екенін жеткізді.
Жарыс қорытындысы бойынша 5-6-сынып қыздар арасында І орынға Көксу ауданының командасы, ұлдар арасында Панфилов ауданының командасы ие болды. 7-8-сынып қыздар арасында І орынға Көксу ауданының, ұлдар арасында Талдықорған қаласының командасы қол жеткізді. 9-11-сынып қыздар І орынды Көксу ауданының, ұлдар арасында Панфилов ауданының командасы жеңіп алды.
Жеңімпаздарға медаль мен арнайы кубок табысталды. Шара соңында облыс әкімінің орынбасары Марлен Көлбаев 900 допты оқушыларға таратып берді.
Медет ЖҰМАБАЙ
