Жетісу облысында екі компания су электр стансыларын салуға бөлінген 221 гектар жерден айырылды.
Бұл туралы Ауылшаруашылығы министрлігі Жер ресурстарын басқару комитетінің баспасөз қызметі мәлім етті. Осылайша, 221 гектар жер мемлекеттік меншікке қайтарылды. 2014 жылы «К» және «А» компанияларына су электр стансыларын салу үшін Ескелді, Көксу және Кербұлақ аудандарында жалпы ауданы 221 гектар жерді алып жатқан 5 жер телімі берілген.
Алайда, жоспардан тыс тексеру барысында аталған жерді алған сәттен бастап олардың қажетті мақсатқа сай пайдаланылмағаны белгілі болды. Осы ретте жер ресурстарын басқару департаменті бұзушылықтарды жою туралы бұйрық шығарған. Бірақ, компаниялар оны орындамаған. Нәтижесінде Жетісу облыстық сотының азаматтық істер жөніндегі сот алқасы учаскелерді мәжбүрлеп алып қою туралы шешім қабылдады.
А. Ыбырай
Фото: gov.kz
