Сарқан қаласында қазақ күресінен облыстық бұқаралық-спорттық іс-шараларды өткізу орталығының қызметкерлері арасындағы турнир өтті. Турнирді өткізудегі басты мақсат –қызметкерлер арасында достық, ұжымдық қарым-қатынасты нығайту.
Аудандық балалар мен жасөспірімдер спорт мектебінде өткен білектілер мен жүректілер жарысына облысымыздың 8 ауданы, 2 қаласынан келген балуандар бақ пен бап сынады. Қазақтың ұлттық биімен бастау алған турнирді Сарқан ауданы әкімінің орынбасары Алмас Байғұнысов, облыстық бұқаралық-спорттық іс-шараларды өткізу орталығының директоры Рүстем Қалиев салтанатты түрде ашып, барша қатысушыларға сәттілік тіледі.
Тартысты өткен жарыста «Жеңіске деген жігері» үшін аталымы бойынша Талдықорған қаласының балуаны «Садыр» атты балуаны Ермек Құрманғалиев марапатталды. Турнирде жүлделі 3-орынды «Найман» лақап атпен Сарқан ауданынан шыққан спорт нұсқаушысы Нұржан Бекмолданов және Ескелді ауданының «Барыс» атты спорт нұсқаушысы Диас Орынбасар иеленсе, 2-орынға «Әшікен» атты Қаратал ауданының спорт нұсқаушысы әрі ең үлкен балуан Арай Дүйсекенов тұрақталды. Ақтық сында топ жарған кербұлақтық балуан Дидар Жанпейісов бұқаралық спорттың арнайы дайындалған чемпиондық белбеуіне ие болып, жеңіс тұғырынан көрінді. Жеңімпаздарға мадақтама қағазы мен бағалы сыйлықтар табысталды.
Жақсылық ЖОМАРТҰЛЫ
Сарқан ауданы
