Қаратал ауданында референдум жұмысы жүйелі жүргізілуде. Әсіресе, қараталдық ақсақалдар бұл істе кейінгі жас буынға үлгі көрсетуде.
1940 жылы өмірге келген тыл ардагері Төлеухан Сүттібаев Ескелді ауылдық округіндегі №150 дауыс беру учаскесіне барып, референдумға қатысып, өз таңдауын жасады.
– Елімізде болып жатқан мұндай ресми қадамға бәріміз де атсалысқанымыз жөн. Себебі әрбір азаматтың дауысы мемлекет үшін үлкен рөл атқаратынын ұмытпағанымыз жөн. Немқұрайдылыққа жол бермеуіміз керек. Елімізде жасалған игі бастаманы біз қараталдық ақсақалдар қашан да қолдаймыз. Ең бастысы – әлемде соғыс болмасын. Тыныш заман үшін біз кезінде еңбек еттік, тер төктік. Ендігі тілек – жас ұрпақтың болашағы жарқын болсын, – деген Төлеухан Әбілмәжінұлы көпшілікке ақ батасын арнады.
