Өнеркәсіп және құрылыс министрлігі қару-жарақ пен әскери техниканы саудасынан бюджетке қалай 1,1 млрд теңге кіріс түскенін түсіндірді.
Қаржы министрлігінің 2024 жылдың 1 тамызға арналған бюджеттің атқарылуы туралы есебінде қару-жарақ пен әскери техника сатудан бюджетке 1 млрд 97 млн 709 мың теңге түскені айтылған. Ал елімізде 2025 жылға дейін қару жарақ пен әскери техника сатуға шектеу қойылған. Өнеркәсіп және құрылыс министрлігі аталмыш шектеу тұрған кезде қару-жарақ пен әскери техника қайда сатылғанын түсіндірді.
«ҚР Үкіметінің 2019 жылғы 29 тамыздағы № 637 қаулысына сәйкес «Қазарнаулыэкспорт» республикалық мемлекеттік кәсіпорны заңнамада белгіленген тәртіппен ҚР Қарулы Күштерінің, басқа да әскерлері мен әскери құралымдарының, арнаулы мемлекеттік және құқық қорғау органдарының пайдаланылмайтын мүлкін өткізуді (экспорттауды) және жоюды жүзеге асыратын уәкілетті ұйым болып айқындалған. Осы кәсіпорын 2024 жылғы қаңтардан бастап шілдеге дейін 34 электрондық сауда-саттық жүргізді. 1 млрд 675,1 млн теңге сомасына 233 пайдаланылмайтын мүлікті сатып алу-сату шарты жасалды. Оның ішінде 151 шарт орындалды. Бұдан басқа, 59,7 млн теңге сомасына 7 шарт бұзылды және сатып алушылар 57,1 млн теңге сомасына 7 шартқа қол қоймады. 135 әскери бөлім мен мекемелерден пайдаланылмайтын мүлікті шығару жүзеге асырылады. Оның ішінде Қорғаныс министрлігінен – 75, Ұлттық қауіпсіздік комитеті Шекара қызметінен – 36, Іішкі істер министрлігі Ұлттық ұланнан – 20, Төтенше жағдайлар министрлігінен – 4 мүлік шығарылды», — деп жазылған жауапта.
Ведомствоның мәліметі бойынша 2024 жылдың 31 шілдесіне дейін жасалған шарттар арқылы республикалық бюджеттің кірісіне 1 млрд 249 млн теңге аударылған. Ал бұзылған шарттар бойынша сатып алушыларға республикалық бюджеттен 151,8 млн теңге қайтарып берілген. Ведомстводағылар пайдаланылмайтын қару-жарақты өткізу жабық сауда-саттық арқылы ұйымдастырылатынын атап өткен.
Сонымен жыл басынан бері күштік құрылымдарға тиесілі болған, бірақ жарамдылық мерзімі өткені үшін сатылымға шығарылған мүліктердің тізімі төмендегі кестеде көрсетілген.
