Ауданның тыныс-тіршілігін тілшілер қауымына жеткізетін, толық ақпаратпен қамтитын аудандық баспасөз хатшылары. Бұрындары әрбір бөлімге хабарласып, ақпарат жинайтын біздер қазір тек осы маман иелерімен қоян-қолтық жұмыс істейміз. Олар өздеріне жүктелген жауапкершілік жүгін ауырсынбай көтеруде. Жылдамдық, ұқыптылық, шапшаңдық, қысқасы журналистке тән барлық қасиетті бір бойына жия білген Алакөл ауданы әкімінің баспасөз хатшысы, әріптесіміз Айжан Мұратқызы жайлы ой қозғамақпыз.
Ақ шағалалы, айдынды Алакөлдің Үшарал қаласында дүние есігін 2001 жылы ашқан біздің кейіпкеріміз Абай атындағы қазақ орта мектебінің түлегі. Мектеп қабырғасында білім алып жүргенде-ақ қазақ тілі мен қазақ әдебиеті пәнін сүйіп оқып, мақала жазып, тіпті, поэзия әлеміне де қалам тербеген. Бар ынтасын оқуға, білімге арнаған Айжан 2019 жылы ҰБТ тапсырып, 107 ұпай жинап, І. Жансүгіров атындағы Жетісу университетінің гуманитарлық ғылымдар жоғары мектебі, филология факультетіне оқуға түседі. Белсенді студент «Til man» жайдарман командасында ойнап, Ілияс оқуларына қатысып, жүлделі орындардан көрініп, көптің ықыласына да бөленіп үлгерген.
Жас маман Алакөл ауданы әкімдігінің ішкі саясат, мәдениет, тілдерді дамыту және спорт бөлімінен өндірістік-іс тәжірибеден өтеді. Жаңашылдыққа жаны құмар ол аудан әкімінің баспасөз хатшысы лауазымына жас маман іздеп жатқанын естіп, бірден жұмысқа орналасады. Міне, бұл Айжан Мұратқызының ең алғашқы еңбек жолы басталған қасиетті шаңырағы.
Үнемі көтеріңкі көңіл күймен жүретін Айжанды барша әріптестері жақсы көреді. Ол жаспен де, жасамыспен де тез тіл табыса алады. Ең бастысы – өз жұмысын бес саусақтай меңгерген маман.
Әдемі әріптесіміздің әлемі де әдемі. Ол ешкімді жатсынбайды. Көмек сұраған жанға алып-ұшып тұратын мінезі де жоқ емес. Өмірге келген соң әдемі өмір сүруді мақсат еткен Айжанның арманы асқақ, мақсаты айқын.
– Қалам ұстаған адамда жауапкершілік екі есе жоғары болады. Себебі БАҚ өкілдері төртінші билік. Біздің қалам ұшындағы ойымызды, көтерген мәселемізді міндетті түрде жауапты тұлғалар естиді, нәтиже шығарады. Халық пен билік арасындағы алтын көпірдің нығаюына аз да болса үлес қосып жүргенімді зор мақтанышпен айтамын. Бұқаралық ақпарат құралдарымен жұмыс істеу сырт көзге оңай көрінгенімен үлкен еңбекті қажет етеді. Халықты сапалы әрі шынайы ақпаратпен қамтамасыз ету, тұрғындардың талап-тілегіне, өтініштеріне ресми жауап ұсыну оңайға соқпайтыны рас. Әсіресе, мен үшін ең қиынға соққаны әлеуметтік желілерге, ресми сайттарға күнделікті жарияланған түрлі жағымсыз сипаттағы мақалаларға жауап беру. Ақпарат айдынында жүргеніме 1 жыл 6 ай болыпты. Осы уақыт аралығында мен көп дүние меңгердім. Бұл мен үшін үлкен жетістік. Әр жетістік адам баласы үшін келесі биікке шығудың баспалдағы. Менің осы дәрежеге жетуімнің де артында тынымсыз еңбек, маңдай тер тұр. Оңы мен солын екшеп-айыра алмайтын, қанаты енді қатайып келе жатқан жас маманды жігерлендіріп, рухтандырып, көңілімді марқайтып жүрген Алакөл аудандық әкімдігінің ұжымына алғыс айтамын», – дейді жас маман.
Ақпарат айдынының аққуындай болған Айжанның істеген әрбір ісі нәтижелі. Олай болса, әріптесімізге өмір жолың да ақ, түзу болсын деп тілейміз!
Еңлік КЕНЕБАЙ
