Алакөл ауданының әкімі Алмас Абдинов Ақши ауылында орналасқан «Alakol Resort» демалыс орнында кәсіпкерлермен кездесіп, көл жағалауын бекіту, электр жарығы, су, қоқыс, кәріз жүйесіне тазарту қондырғысын орнату, ауылдың ішкі көшелері, су көлігі, байланыс жүйесі, төтенше жағдайлардың алдыналу сынды мәселелерді талқылады.
Жиында әр сала басшылары туризмді дамытуда кенжелеп жатқан мәселелер бойынша есеп беріп, атқарылған ауқымды жұмыстарды таныстырды. Атап айтсақ, қажетті инфрақұрылым тарту бағыты бойынша бүгінгі таңда Алакөл ауданы әкімдігі тарапынан «Бескөл – Ақши» ауылдарының аралығына жоғары кернеулі 110 кВттық, желілерді тарту бойынша жобалық-сметалық құжаты әзірленіп, бюджеттік өтінім жолданған. Сонымен қатар, Ақтоғай – Көктұма бағытында жоғары кернеулі 220 кВттық электр желісін салу жұмысының жобалық-сметалық құжатын әзірлеу жалғасуда.
Тұрғындарды толғандырған Алакөл жағалауындағы электр энергиясы мәселесін шешу мақсатында Ақши ауылында орналасқан қосалқы стансыға 2 дана 6300 кВт және 6 дана трансформатор орнатылып, пайдалануға берілген. Ақши ауылы мен көл жағалауын электрмен қамтамасыз ету, электр энергиясының өткізу қабілетін жоғарылату жұмыстары жоспар бойынша жүргізілуде.
Бүгінде көл жағалауындағы 77 демалыс орны орталықтандырылған ауызсу жүйесіне қосылған. Тағы да 23 демалыс орны орталықтандырылған ауызсу жүйесіне қосылуға өтініш білдірген. Демалыс орындары мен демалушыларға қолайлы жағдай туғызып, су жүйесімен толық әрі дұрыс қамтамасыз ету мақсатында «Алакөл су» жұмысты бастап кеткен. Ал Ақши ауылындағы көл жағалауына 17 орынға автотұрақ салынып, арнайы жол белгілері орнатылған.
Ырғайты ауылдық округіне қарасты көл жағалауындағы санитарлық тазалық жұмысына жауапты мердігер «ALA COMPANY» ЖК және «Береке» ЖК 13 шақырым жерге 130 дана қоқыс жәшігін орнатса, мердігер «Аla company» ЖК қоқыс қалдықтарын арнайы орынға тасымалдау жұмыстарын жүргізеді. Сондай-ақ, Ақши ауылындағы 3 шақырымда орналасқан қоқыс полигонын «Қыраубаева» ЖК-не сенімгерлік басқаруға және ақылы қызмет көрсетуге берілген. Олар бұл міндеттемені тыңғылықты атқаруда.
Биыл Ақши мен Көктұма туристік аймағында жаңадан 8 туристік нысан іске қосылып, демалыс орнын 310-ға жеткізу көзделуде. Ойға алған жоспар толық орындалғанда Алакөлге келетін турист саны 1 млн. 600 мың адамнан асады.
Қажет АНДАС
Алакөл ауданы
