Қазақстан мен Еуропалық одақ арасында қазақстандықтарға Шенген визасын беру тәртібін жеңілдету жөніндегі келіссөздер жалғасып жатыр. Бұл туралы СІМ ресми өкілі Жанболат Үсенов мәлімдеді, – деп хабарлайды 7-su.kz ақпараттық порталы KAZ.NUR.KZ сайтына сілтеме жасап.
Оның айтуынша, келіссөздер ілгері сатыда. Алайда тараптар арасындағы талқылаулардың нақты мазмұнын жария етуге болмайды.
«Келіссөздер ілгері сатыда, процесс жүріп жатыр. Еуропалық серіктестерімізге түсіністік танытқаны үшін алғыс айтамыз. Көптеген мәселе бойынша ортақ түсіністікке келіп жатырмыз. Ақылға қонымды мерзімде оң нәтиже болады деп үміттенемін», – деді Жанболат Үсенов.
Брифинг барысында журналистер Шенген визасын рәсімдеу кезінде төленетін консулдық алымды азайту және виза беруден негізді түрде бас тартылған жағдайда оның бір бөлігін қайтару мәселесі де қарастырылып жатқан-жатпағанын сұрады.
СІМ өкілінің сөзінше, Қазақстан визалық режимге қатысты келіссөздерде мұндай мәселелерді үнемі көтереді. Дегенмен еліміздің басты мақсаты – азаматтар үшін визасыз режимге қол жеткізу.
«Біздің басты мақсатымыз – басқа елдермен келіссөз жүргізу кезінде Қазақстан азаматтары үшін визасыз режимді қамтамасыз ету. Ал аралық мақсаттарға визалық алымдарды төмендету, визаның қолданылу мерзімін ұзарту, қажетті құжаттар санын қысқарту және басқа да жеңілдіктер жатады. Бұл мәселелер кез келген елмен келіссөз барысында айтылады», – деді ол.
