Елімізде биылғы 6-мамырдан бастап жолда жүру ережелеріне қатысты жаңа өзгеріс күшіне енді. Мұндағы мақсат – жолдағы қауіпсіздікті нығайтуға арналған бірнеше заң қабылданған.
Енді біржолақты жолда көлікті басып озғандарға жаза қатаңдады. Олар бұрынғыдай айыппұлмен құтылмайды. Жарты жылға дейін жүргізуші куәлігінен айырылады. Сондай-ақ, қоғамдық көлік жүретін арнайы жолақта енді автобус қана жүрмейді.
Жаңа өзгерістерде қандай артықшылықтар бар? Ендігі ретте жүргізушілер нендей жайларды ескеруі тиіс? Жол бойына жаңаша қандай белгілер қойылады? Бұл жайында облыстық полиция департаменті әкімшілік практика бөлімінің бастығы Саят Ибраимовтан сұрап-білдік.
– Жолда жүру ережелеріне қатысты жаңа өзгерістерге сай елді мекендерде автобус жылдамдығы сағатына 50 шақырым болып төмендетілді. Ал қоғамдық көліктерге арналған жолақпен енді автобус санатына жататын көлік құралдары да еркін қозғала алады. Оларға салмағы 5 тоннадан асатын, 8 жолаушыға арналған «темір тұлпарлар» жатады, – деді Саят Ибраимов.
Жоғарыда айтқанымыздай, тың өзгеріске сай жаңа сәйкестендіру белгілері пайда болды. Енді электромобиль иелері арнайы белгі жапсыруы тиіс. Дәл осындай белгі газ жабдығы қосылған көліктерге де ілінеді. Айтпақшы, жаяу жүргіншілердің қауіпсіздігін қамтамасыз ету үшін тротуарларға «электрлі самокаттардың жүрісіне тыйым салынады» деген белгі қойылады. Сонымен қатар, енді жол қозғалысы ережелерінде «мүгедек» белгісін «тірек-қимыл аппараты бұзылған үшінші топтағы мүгедектер немесе осындай мүгедектер тобын тасымалдайтын» азаматтардың көліктеріне ілуге рұқсат етіледі.
Жолдағы қауіпсіздікті нығайтуға арналған шаралар нәтижесінде енді жол бойында «электрлік скутерлерге жүруге тыйым салынады», «параллель жолға бұрылу», «параллель жолдың соңы», «диагональді жаяу жүргіншілер өткелі» сынды белгілер орнатылады. Облыстық полиция департаменті әкімшілік практика бөлімінің бастығы Саят Ибраимовтың айтуынша, жаңа өзгерістер жол-көлік оқиғасының санын азайтып, қауіпсіздікті артырады.
Дастанбек САДЫҚ
Коллаж: Әсел Балтақызы
