«Бала қуанса – әлем шаттанады» деген сөз бар. Шынында солай. Жуырда «Күншуақ» облыстық балаларды оңалту орталығы коммуналдық мемлекеттік кәсіпорнында өткен шара сөзімізге дәлел.
Айтулы шараны Қазақстан Республикасы Сыбайлас жемқорлыққа қарсы іс-қимыл агенттігінің Жетісу облысы бойынша департаменті мен облыстық қоғамдық даму басқармасы ұйымдастырған. «Мен бақытты баламын» кешінде бүлдіршіндер келген меймандарға әсем әннен шашу шашып, мың бұрала биледі. Орталықтың тәрбиеленушілері Әли Бекен, Гарик Кузнецов мейірімділік турасында жүрек тебіренісін өлеңмен жеткізді. Балаларды құттықтай келген Жетісу облысы бойынша Сыбайлас жемқорлыққа қарсы қызмет агенттігінің правинция бөлімінің басшысы Ермек Сұлтанқұлов пен облыстық денсаулық сақтау басқармасы басшысының орынбасары Жанетта Нариманқызы және Талдықорған қаласы «Иман» орталық мешітінің өкілі Ернар Дәлелханұлы бүлдіршіндердің өнеріне тәнті болып, мерекемен құттықтады.
Қ. Байсейітов атындағы саз колледжінің белсенділері де мерекелік шараның шырайын келтірді. Жырдан өрнек өріп, әнмен көмкерді. «Күншуақ» облыстық балаларды оңалту орталығына келген меймандар балғындарға бағалы сыйлықтарын да тарту етті.
Арсен ҚАЗТАЙ,
ЖУ білімгері
