Үшінші рет ұйымдастырылған «Ұлы Дала жорығы» марафон-бәйгесі өз мәресіне жетті. Биылғы дода көрнекті геолог-ғалым Қаныш Сәтбаевтың 125 жылдығына арналды. Бес күнге созылған аламан Павлодардан басталып, Астанада аяқталды. Жорық 500 шақырымды құрады. Еліміздің 18 аймағынан 90-ға жуық шабандоз қатысты.
Жетісулықтар екінші жыл қатарынан топтан бөлініп, мәреге бірінші келді. Олардың жалпы уақыты – 32 сағат, 40 минут, 18 секунд. 2-орынды Маңғыстау облысының шабандоздары (33 сағат, 05 минут, 30 секунд), 3-ші болып Алматы қаласының командасы (33 сағат, 31 минут, 08 секунд) алды. Төрттікті жамбылдықтар, 5-ші болып Астана қаласының спортшылары келді.
Ал жекелей көрсеткіш бойынша Мәулетхан Ералы (Жетісу облысы, 32 сағат, 24 минут, 42 секунд), Әлихан Мұхамбетов (Қостанай облысы, 32 сағат, 32 минут, 08 секунд), Әбіш Етреков (Шығыс Қазақстан облысы, 34 сағат, 01 минут, 37 секунд), Дулат Жұмашев (Шығыс Қазақстан облысы, 34 сағат, 53 минут, 37 секунд) үздік шықты.
Биыл Павлодар – Астана бағытындағы марафон-бәйгеге барлығы 19 команда қатысқанымен олардың тек 11-і ғана белгіленген межені толық жүріп өтті. Енді үздіктерден көрінген үштік 2-7 қыркүйек аралығында өтетін «Ұлы Дала жорығы» күзгі халықаралық марафонына қатысады.
– Бүгінде «Ұлы Дала жорығы» марафон-бәйгесі тек дүбірлі додаға ғана емес, сонымен қатар көшпенділер мәдениетін ілгерілетудің бірегей жобасына айналды. Қыркүйек айында шабандоздарымызды жаңа жарыс күтіп тұр. Олар V Дүниежүзілік көшпенділер ойындары қарсаңында халықаралық марафонға қатысады. Бұл – бүкіл әлемге шабандоздарымыздың ептілігі мен шеберлігін, сондай-ақ, қазақ жылқыларының төзімділігін көрсетудің тамаша мүмкіндігі, – деді ҚР Ұлттық спорт қауымдастығының президенті Исламбек Салжанов.
