Талдықорғанға ҚР Туризм және спорт вице-министрі Мирас Төлебаев іссапармен арнайы келді. Жетісу облысындағы туризм және спорт саласының мамандарымен кездесу өткізіп, шаһардағы «Жетісу Арена» мұз кешенінің, «Жастар» спорт сарайы мен «Altyn Emel» визит-орталығының қызметімен танысты.
Жиында облыстық дене шынықтыру және спорт басқармасының басшысы Ұлан Рысқұл өңірдегі туризм және спорт саласындағы жетістіктерді баяндап, атқарылып жатқан жұмыс легінен ақпар берді. Оның артынша сөз алған кәсіпкерлік және индустриялық — инновациялық даму басқармасы басшысының орынбасары Серік Сәбетайұлы облыста туризмді ілгерілету негізіндегі жоспармен жиылған көпшілікті құлағдар етті.
ҚР Туризм және спорт вице-министрі өз сөзінде Жетісу облысының мемлекет туризмін дамытуға қосқан үлесі орасан зор екенін, елімізде туризмді дамыту бойынша жүргізіліп жатқан жұмыстар туралы хабарлады. Халықаралық ұйымдардың сарапшылары туризм саласы пандемияға дейінгі көрсеткіштерге тек 2025 жылы жетеді деп мәлімдегенімен Қазақстанда бұл сала қалпына келді, тіпті өткен жылы да өсу қарқыны байқалды деп атап өтті. Бұл отандық туристік қызметтер нарығын қолдаудың, салаға инвестициялар тартудың, республика ішінде сапарларды ұлғайту бойынша қабылданған шаралардың арқасында болғанын алға тартты.
– Өткен жылы Қазақстанға 9,2 млн. шетелдік азамат келген, бұл пандемия алдындағы деңгейден 700 мыңға артық. Қазақстандықтардың ел ішіндегі туристік сапарларының көрсеткіші 2019 жылғы деректерден 3 млн.-ға және 2022 жылғы деректерден 1,1 млн.-ға артық, туризм салаларынан бюджетке түсетін салық түсімдері 453 млрд. теңгені құрады, бұл 2022 жылғы көрсеткіштен 64 млрд. теңгеге артық. Жетісу облысына 2023 жылдың қорытындысы бойынша 269 071 мыңнан астам турист келген. Көрсетілген қызметтер көлемі 4,6 млрд. теңгеге бағаланады, төсек-орын саны 16 189 бірлікті құрады, – деді ол өз сөзінде.
Елде демалысқа деген сұраныстың артуы туризм саласындағы жаңа жобаларды белсенді түрде инвестициялауға мүмкіндік тудырып отыр. Инвестициялық жобалар пулында тұрақты мониторингке сәйкес 446,6 млрд. теңге сомасына 293 жоба бар. Оның ішінде ағымдағы жылы жалпы сомасы 246 млрд. теңгеге 148 жобаны іске асыру жоспарлануда. 2023 жылы өңірде жеке инвестициялар есебінен 3,5 млрд. теңгеге 17 нысан іске қосылды (Алакөл ауданында 15, Текелі қаласында 2). Осы жылы жалпы сомасы 2,9 млрд. теңгеге 11 инвестициялық жобаны іске асыру көзделуде. Олардың ішінде Панфилов ауданында қонақүй салу бар.
Шара аясында Жетісу өңірінде туризм саласына ілеспе инженерлік инфрақұрылымның 7 жобасын, жағалауды нығайту бойынша 1 жобаны, инженерлік-коммуникациялық желілердің 2 жобасын, электрмен жабдықтау бойынша 1 жобаны, сондай-ақ, жалпы сомасы шамамен 46,3 млрд. теңгеге өрт қауіпсіздігін қамтамасыз ету бойынша 1 жобаны іске асыру туралы сөз қозғалды.
Туризм және спорт министрлігі өкілінің сөзіне сәйкес Алакөл және Балқаш көлінің жағалауында туристік инфрақұрылымды дамытуға ерекше көңіл бөлінеді. Туристік нысандар құрылысында жаңа трендтер байқалуда. Елдің 8 аймағында глэмпинг болатын 40-тан астам кешен бар.
Мирас Төлебаевтың айтуынша, экотуризмге деген сұраныстың артуын ескере отырып, ұлттық саябақтарға барудың рекордтық көрсеткіштері үнемі тіркеліп отырады. 2023 жылы облыс аумағында орналасқан «Алтынемел» мемлекеттік ұлттық табиғи паркіне 14,5 мың адам барған екен. Соңғы 2 жылда елімізде туристерге арналған 16 орталық салыныпты.
ҚР Туризм және спорт вице-министрі мемлекеттік қолдау шаралары бойынша оң серпін бар екенін атап өтті. Өткен жылдың қорытындысы бойынша мемлекеттік қолдауға мақұлданған өтінімдердің көлемі 2022 жылмен салыстырғанда 8 есеге ұлғайған, осылайша жалпы сомасы 800 млн. теңгеден астам өтінімдер мақұлданыпты.
Жиында биылғы жылдың маңызды оқиғаларының бірі Астанада V Дүниежүзілік көшпенділер ойындарын ұйымдастыру және өткізу екендігі түсіндірілді. Оған әлемнің 100-ден астам елінің өкілдері қатысады деп күтілуде.
Содан кейін ҚР Туризм және спорт вице-министрі Мирас Төлебаев кездесуге қатысушылардың сұрақтарына жауап берді.
Медет ЖҰМАБАЙ
