Талдықорған тұрғындары енді әр аптаның сенбі күні «Жастар» және «Жеңіс» саябақтарына келіп, сенбілік спорттық шараларға қатыса алады. Дене қыздырудан бастап түрлі қозғалыстарға арналған жаттығулар жасайды. Белсенді қатысқандарға ұйымдастырушылар тарапынан сый-сияпат та қарастырылған. Алғашқы болған шараға түрлі жастағы 500-ге жуық адам қатысты.
– Бұл шараның негізгі мақсаты – бұқаралық спортты қарқынды дамытып, салауатты өмір салтын ұстану. Өңірімізде дене шынықтырумен айналысатындардың санын көбейту. Бастамамызды қолдап келгендерге алғысым шексіз, келесі сенбіде қатарымыз бұдан да көп болады деп ойлаймын, – дейді облыстағы бұқаралық-спорттық іс-шараларды өткізу орталығының директоры Рүстем Қалиев.
Мамандардың айтуынша, таңғы дайындық адамның иммундық қабілетін арттырып, қан айналымын реттейді. Сонымен қатар, күні бойы сергек жүруге септігін тигізеді.
Әр сенбі сайын өтетін Денсаулық күнінде таңғы гимнастика, таңғы серуен, түрлі спорттық ойындармен қатар ыстық шай мен тәттілер де ұйымдастырылған. Жиналғандар арасында облыстағы ардагерлерді бастап келген Ермек Келемсейіт те болды. «Денсаулық фестивалі» өтетінін естіген ол 70-тен ассам да үйде жата алмадым», – дейді.
– Қаламызда спортқа деген қолдау жақсы. Әсіресе үлкендер қауымының осындай іс-шараға қатысып, жастарға үлгі көрсетіп жатқандығы қуантады. Бұл жерде, ең бастысы, әркім өз денсаулығын нығайтып, саламатты өмір салтын дұрыс жолға қоюға мүмкіндік алады, – дейді қала тұрғыны, шараға қатысушы Сәтбек Ғазизбекұлы.
Шара соңында белсенділігімен көзге түскендер Мақтау қағаздары және бағалы сыйлықтармен марапатталды. Ұйымдастыушылардың айтуынша, енді аптаның әр сенбісі күні осындай бұқаралық спорттық шаралар өтіп тұрады.
Қали АСҚАР
Суретті түсірген Дмитрий ЕРОФЕЕВ
