Сарқан ауданының Екіаша ауылында шаңғы спортынан облыстық чемпионат өтті. Жарыс шымылдығын аудан әкімі Ғалымжан Маманбаев пен облыстық дене шынықтыру және спорт басқармасының басшысы Ұлан Рысқұл ашып, сайысқа қатысушыларға сәттілік тіледі.
Адам ағзасына пайдалы әсер ететін спорт түрлері ауданымызда жылда өткізіліп келеді. Қары мол түсетін таулы аймақтың қырат-қырлары шаңғышылар мүмкіндігін жан-жақты көрсетуіне қолайлы..
Әйелдер және ерлер арасындағы жарыс тартысты өтті. Ерлер 1500, 3000 метр қашықтыққа сынға түсті. Олардың арасында талай сынға түсіп, шыңдалған, оза шапқан тәжірибелері мол жас спортшылар мен сақа спортшылар қатары көп болды.
Сонымен жан алысып, ащы терлері шыққан екі күндік жарыстың нәтижесінде жалпы командалық бірінші орынды Кербұлақ ауданының командасы жеңіп алды. Жеңімпаз командаға дене шынықтыру және спорт басқармасының кубогы мен ақшалай сыйлық табысталды. Ал екінші, үшінші орындарды Талдықорған қаласы мен Алакөл ауданының командалары бөлісіп, мерейлері үстем болды.
Жақсылық ЖОМАРТҰЛЫ
Сарқан ауданы
