ҒАСЫРДАН КЕЙІНГІ ҚАУЫШУ

Жаһанның үздіктері бас қосатын, жүзден жүйрікті анықтап, әлем алдында елінің және өзінің есімін мәшһүр ететін Олимпиада ойыны биыл Францияның бас қаласы Парижде өтеді. «Азаттық. Теңдік. Бауырластықты» ұран еткен француздардың барша мемлекетті бір жерге тоғыстырып, Олимп ойындарын ұйымдастыруы өздері үшін үшінші мәрте болмақ (осыған дейін 1900 жылы және 1924 жылы ұйымдастырды). Яғни, Париж қаласына араға 100 жыл салып төрт жылдықтың басты бәсекесі қайта оралды. 

БІРАУЫЗДАН ҚОЛДАДЫ

Париж қаласы Олимпиада ойындарын өткізу құқығын 2017 жылғы қыркүйекте Перудің Лима қаласында Халықаралық олимпиада комитетінің 131 сессиясында жеңіп алды. Дауыс берушілер бірауыздан қолдаған болатын. Биылғы Олимпиада ойындары 32 спорт түрінен өтеді. Негізгі 28 олимпиадалық спорт түрі сақталып, қосымша брейк-данс, скейтбординг және серфинг, спорттық альпинизм қосылды. Дода 26 шілде мен 16 тамыз аралығында болады. Ашылу және жабылу салтанаты 78 338 көрерменге есептелген «Стад де Франста» өтеді. Одан бөлек, сайыс «Парк де Пренс», «Пари-Ла-Дефанс Арена», «Ролан Гаррос», «Париж-Берси», «Ив дю Мануар», «Зенит», «Марсель-Сердан», «Ле-Бурже», «Сен-Дени», «Жан-Буэн», «Сена», «Велодром», «Версюр-Марн», «Гран-Пале», «Версаль» сынды заманауи алаңдарда болмақ. Негізгі жарыс Парижде өткенімен кей сайыс Марсель, Лион, Тулуза, Ницца, Сент-Этьен, Бордо және Нант қалаларында да ұйымдастырылады.

Әр Олимпиаданың өзіндік ерекшелігі бар. Олимпиада мен Паралимпиада ойындарының эмблемасы 2019 жылдың қазанында көпшілікке ұсынылды. Медальда да өзгешелік бар. Мәселен, 1900 жылы Париж Олимпиадасына қатысқан қыздардың құрметіне орай медаль ішінде Олимпиада алауы мен Францияның негізгі символдарының бірі Марианнаның еріні бейнеленді. Ал талисман есебінде фирги қалпағы ұсынылды. Бұл да Францияның құрмет тұтар негізгі құндылықтарының бірі. Фрижи – қызыл, көк және ақ түске боялған. Кеуде тұсында Олимпиаданың эмблемасы орналасты. Өзіндік қасиеттерін барынша паш етуге тырысқан. Ұйымдастырушы мемлекет өзіне тән ерекшелікті ашып көрсетіп, Олимпиаданың басты эмблемасын талисманына енгізді. Еліміз жазғы Олимпиада ойындарына сегізінші мәрте қатыспақ.  

ТОКИОДАҒЫ СӘТСІЗДІКТЕН КЕЙІН…

Қызу дайындық жүргізіп, жаһан жарысының алдында өзгерістермен қосымша істерге күш салып жатқан Қазақстан құрамасы да Париж Олимпиадасында жақсы нәтиже көрсетіп, ірі табысқа жетуді көздейді. Иә, Олимпиада жолына шыққан әр мемлекеттің көздейтіндігі анық, бірақ біздің бүгінгі серпіліс ерекше. Өйткені, кейінгі өткен Токио Олимпиадасында жерлестеріміз сүреңсіз өнер көрсетіп, жанкүйерлерді жерге қаратқан еді. Жапония жерінде бар болғаны 8 қола медаль алып, жалпы командалық есепте 83-орынды қанағат тұтты. Осыған дейінгі Қазақстанның Олимпиададағы нәтижесі дәл осындай төмен, жағдайы мүшкіл болмаған еді. Сол олқылықтың орнын толтыру мақсатында спортшыларымыз да, оны қадағалап отырған басшыларымыз да дұрыс жоспар құрып, барын салады деген ниеттеміз. 

ЖАРЫС ЖОЛЫНДАҒЫ ЖЕТІСУЛЫҚТАР

Париж олимпиадасына қатысуды мақсат тұтқан спортшыларымыздың алды жолдама алып, қалғандары іріктеу сында өзін көрсетуге дайын. Елімізге алғашқылардың бірі болып Париж Олимпиадасының жолдамасын жетісулық садақшылар Ильфат Абдуллин, Александр Еременко және Дәулеткелді Жаңбырбайдан жасақталған Қазақстан құрамасы сыйлады. Садақшыларымыз Тайландтың Бангкок қаласында өткен Азия чемпионатында екінші орын алып, төрт жылдықтың басты додасына қатысуға мүмкіндік алды. 

– Биылғы маусымды ойдағыдай аяқтадық. Барлығы жоспар бойынша жүзеге асты. Мақсатымыздың бірінші сатысы орындалып, Олимпиадаға жолдама алып отырмыз. Келесі меже – төрт жылдықтың басты жарысында жақсы нәтиже көрсету. Қараша-желтоқсан айларында өзімізді қалыпқа келтіріп жатырмыз. Қаңтардан бастап жаттығуды күшейтеміз. Дәл қазіргі сәтте физикалық тұрғыда дайындалып, көңілді соған бөліп жатырмыз. Ал наурыздан бастап оқу-жаттығу жиындары жоспарланған. Олимпиадаға аз уақыт қалды. Ал біз әр күнді жоспарлап, тыңғылықты дайындық жүргізіп жатырмыз, – дейді Ильфат Абдуллин.

Токио Олимпиадасында бар болғаны 8 қола болса, соның 2 медалін жетісулық ауыр атлет Игорь Сон мен Зүлфия Чиншанло алған болатын. Биыл Жетісудан шығатын жүлдегерлер де көп болады деген ойдамыз.

Серік ҚАНТАЙ