Саламатты өмір салтын қалыптастырып, бұқаралық спортты дамыту аса маңызды. Осыған орай Жетіжал ауылында спорт алаңы қолданысқа берілді.
Спорт алаңының ашылу салтанатында аудан әкімі Дәулет Халелов құттықтау сөз сөйлеп, алаңның лентасын қиды.
– Жастарды спортқа баулуды бүгіннен бастауымыз керек. Болашақта жетіжалдық жас өрендер кәсіпқой спортшылардың қатарына қосылып, ел намысын қорғайтын болады. Жаңа спорт алаңы бұқаралық спорттың алға өрлеуіне үлес қосады деп сенеміз. Құрылыс жұмыстары өзінің уақытында әрі сапалы аяқталғаны бәріңізге мәлім. Сол үшін аудандық құрылыс бөлімі мен мердігер мекемеге алғыс білдіремін, – деді аудан әкімі.
Жетіжал ауылының балалары бұған дейін футбол ойнау үшін 5-6 шақырымдық жердегі көрші Көксу бекетіне баруға мәжбүр болған. Халық үніне құлақ асқан аудан әкімдігі қыркүйек айында құрылыс жұмыстарын бастауға барлық мүмкіндікті қарастырған. Жыл соңында пайдалануға берілген спорт алаңының құрылыс жұмысына 23 миллион теңге жұмсалыпты. Аумағы 1000 шаршы метрге жуық алаңда балалар футбол, волейбол және де басқа да спорттық ойындарды ойнайды.
Е. БАУЫРЖАНҚЫЗЫ
Көксу ауданы
